ބޮލީވުޑްގެ ކާމިޔާބު ޑައިރެކްޓަރު އަލީ އައްބާސް ޒަފަރު އައްބާސް އަނެއްކާ ވެސް ޔާޝްރާޖް ފިލްމްސް ވައިއާރްއެފް) އަށް ފިލްމުތަކެއް ހަދަން ހަމަޖެހިއްޖެ އެވެ.
މީޑިއާތަކުން ބުނީ ބޮލީވުޑްގެ އެންމެ ބޮޑު ޕްރޮޑަކްޝަން ހައުސްއާ އަލީ އަލުން ގުޅުނީ ޕްރޮޑިއުސަރު އަދިތިޔާ ޗޯޕްޅާގެ އެދުމުގެ މަތިން ކަމަށެވެ. އެގޮތުން އޭނަ އެ ސްޓޫޑިއޯގެ ތިން ހަތަރު ޕްރޮޖެކްޓަކަށް އެއްބަސްވެފައިވާ ކަމަށް ބުންޏެވެ. އަލީ ޑައިރެކްޝަނަށް ނުކުތީ ވައިއާރްއެފްގެ 2011 ގެ "މޭރޭ ބްރަދާ ކީ ދުލްހަން" އިންނެވެ. އޭގެ ކުރިން އެ ސްޓޫޑިއޯގެ ބައެއް ފިލްމުތަކުގެ އެސިސްޓެންޓް ޑައިރެކްޓަރެއްގެ ގޮތުގައި އޭނަ މަސައްކަތް ކުރި އެވެ.
ވައިއާރްއެފަށް އަލީ އެންމެ ފަހުން ހެދި ފިލްމަކީ 2017 ގެ "ޓައިގާ ޒިންދާ ހޭ" އެވެ. އެ ސްޓޫޑިއޯ އަށް އޭނަ ހެދި ފިލްމުތަކުގެ ތެރޭގައި 2014 ގެ "ގުންޑޭ" އާއި 2016 "ސުލްތާން" ހިމެނެ އެވެ.
މިހާރު އޭއޭޒެޑްގެ ނަމުގައި އަމިއްލަ އަށް ޕްރޮޑަކްޝަން ހައުސްއެއް ހަދައި އަމިއްލަ އަށް ވެސް ފިލްމު ޕްރޮޑިއުސްކުރަމުން އަންނަ އަލީގެ އެންމެ ފަހުގެ ފިލްމަކީ އޭނަ ޕްރޮޑިއުސްކޮށް، ޑައިރެކްޓްކޮށް މި އަހަރުގެ އެޕްރީލްގައި ގެނެސްދިން "ބަޅޭ މިޔާ ޗޯޓޭ މިޔާ" އެވެ.
އަލީ އަލުން ވައިއާރްއެފަށް ފިލްމުތަކެއް ހަދަން ހަމަޖެހުނު ނަމަވެސް އަދި އެއްވެސް އާ ޕްރޮޖެކްޓެއް އިއުލާނެއް ނުކުރެ އެވެ.