ރާއްޖޭގައި ހެލިކޮޕްޓަރުހެ ހިދުމަތް ދޭން އަދި އެއްވެސް ބަޔަކާ ހަވާލު ނުކުރާ ކަމަށް ޓްރާންސްޕޯޓް މިނިސްޓްރީން ބުނެފި އެވެ.
އެ ހިދުމަތް ބަޔަކާ ހަވާލުކޮށްފައިވާ ކަމަށް ބުނެ ވާހަކަ ދެކެވޭތީ މިނިސްޓްރީން ބުނީ ހެލިކޮޕްޓަރުގެ ހިދުމަތް ދޭން ޝައުގުވެރިވާ ބަޔަކު ހޯދުމަށް އެކްސްޕްރެޝަން އޮފް އިންޓަރެސްޓް (އީއައިއޯ) އަށް މި މަހުގެ ކުރީކޮޅު ހުޅުވާލައި މި މަހުގެ 19 އަށް ސުންގަޑި ހަމަވި އިރު، 36 ފަރާތަކުން ޝައުގުވެރިކަން ފާޅުކޮށްފައިވާ ކަމަށެވެ.
ނަމަވެސް އޭގެ ތެރެއިން އެއްވެސް ބަޔަކަށް މިކަން އަދި އެވޯޑް ނުކުރާ ކަމަށް މިނިސްޓްރީން ބުންޏެވެ. އެެގޮތުން އެ ހިދުމަތް ދޭން ރީޖަނަލް އެއާޕޯސްޓް ކޮމްޕެނީ (އާރްސީއެލް) އާ ހަވާލުކޮށްފައިވާ ކަމަށް ދެކެވޭ ވާހަކަ އަކީ ވެސް ރަނގަޅު ވާހަކައެއް ނޫން ކަމަށް ޓްރާންސްޕޯޓް މިނިސްޓްރީން ބުންޏެވެ.
މިނިސްޓްރީން ބުނެފައިވާ ގޮތުގައި ރާއްޖޭގައި އަލުން ހެލިކޮޕްޓަރުގެ ހިދުމަތް ފަށަން ހަމަޖެހިފައި ވަނީ ކުއްލި ހާލަތްތަކުގެ ޚިދުމަތްތަކާއި ޓޫރިޒަމް ދާއިރާ އަށް ހާއްސަކޮށްގެންނެވެ. މިނިސްޓްރީން ބުނެފައި ވަނީ ހިދުމަތް ދޭން އެއްބަސްވުން ހަވާލު ކުރާ ބަޔަކަށް 10 އަހަރުގެ މުއްދަތަކަށް ހުއްދަ ދޭނެ ކަމަށެވެ.
ރާއްޖޭގައި މީގެ ކުރިން ވެސް ވިޔަފާރީގެ އުސޫލުން "ހަމިންބާޑް" ގެ ނަމުގައި ހެލިކޮޕްޓަރުގެ ހިދުމަތް ދީފައިވެ އެވެ. އަދި މި ފަހުން ރާއްޖޭގައި ހެލިކޮޕްޓަރު އޮޕަރޭޓްކުރީ ހަމައެކަނި ކުއްލި ހާލަތްތަކުގަ އެވެ. އެއީ އިންޑިއާ ސަރުކާރުން ދީފައިވާ ދެ ހެލިކޮޕްޓަރުގަ އެވެ.