ކުރީގެ ނައިބު ރައީސް އަހުމަދު އަދީބު އަދި އެހެންވެސް މީހެއްގެ އަތުން އެއްވެސް އިރަކު އެއްވެސް ފައިސާއެއް ނުގާފައި ނުވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
ކުރީގެ ރައީސް އަބްދުﷲ ޔާމީންގެ ޕީއެންއެފްއިން ބޭއްވި ޖަލްސާއެއްގައި ވަނީ، ކުރީގެ ނައިބު ރައީސް އަހުމަދު އަދީބު ހައްޔަރުކުރުމާއި ގުޅޭ ކަންކަމުގައި ރައީސް އޮފީހުގައި އަދި ޕާޓީ އޮފީހުގައި ދެކެވޭ ވާހަކަތަކުގެ މައުލޫމާތު ދިނުމަށް ރައީސް މުއިއްޒު، އަދީބު އަތުން 14 މިލިއަން ނެންގެވި ކަމަށް ތުހުމަތުކޮށްފައެވެ.
ސަންގު ޓީވީ އަށް ދެއްވި އިންޓަވިއުއެއްގައި މި ތުހުމަތުތަކަށް ރައްދު ދެއްވާ ރައީސް މުއިއްޒު ވިދާޅުވީ، އެއްވެސް އިރެއްގައި އެއްވެސް މީހަކަށް ޖާސޫސު ކޮށްދީފައި ނުވާނެ ކަމަށާއި އަދި މިފަދަ ވާހަކަތައް އިވޭތީ ހައިރާންވާ ކަމަށެވެ.
ރައީސް މުއިއްޒު ވިދާޅުވީ އެއްވެސްއިރަކު އަދީބު އަތުން އަދި އެހެން މީހެއް އަތުންވެސް ފައިސާ ހޯދާފައި ނުވާނެ ކަމަށެވެ.
އެކީގައި ކެބިނެޓްގައި މަސައްކަތް ކުރެއްވި ނަމަވެސް އަދީބަކީ ގާތްކޮށް އުޅުނު މިނިސްޓަރެއް ނޫން ކަމަށާއި އަދީބާއި ދެމެދު އޮންނަނީ ޕްރޮފެޝަނަލް ގުޅުމެއް ކަމަށް ރައީސް މުއިއްޒު ވިދާޅުވިއެވެ.