ތޫނު ހަތިޔާރު ގެންގުޅޭ ކަމުގެ ތުހުމަތުގައި ހައްޔަރުކުރި މީހަކު، ވަަޅިއެއް ގެންގުޅުނީ ހަށިރައްކަލަކަށް ކަމަށް ބުނެފި އެވެ.
އެ މައްސަލައިގައި އިއްޔެ މާލެ އިން ހައްޔަރުކުރީ ބ. ދަރަވަންދު އަށް ނިސްބަތްވާ 28 އަހަރުގެ ފިރިހެނެކެވެ. އޭނަގެ އަތުން ފެނިފައި ވަނީ 8 އިންޗީގެ ވަޅިއެކެވެ. އޭނަ ތޫނު ހަތިޔާރު ގެންގުޅޭ ކަމަށް ތުހުމަތު ކުރެވިގެން ބަލައި ފާސްކުރި އިރު ވަޅި ފެނުނީ ލައިގެން ސޯޓުން ބަނޑާ ދިމާލުގައި ފޮރުވާފައި އިންދަ އެވެ.
އޭނަގެ ބަންދު އަމުރުގައިވާ ގޮތުން އެ ވަޅި އަކީ ހަށިރައްކަލަކަށް ގެންގުޅުނު އެއްޗެއް ކަމަށާއި އަދި އެ ވަޅި އަކީ ތަނަކަށް ގެންދަން ގެންގުޅުނު ވަޅިއެއް ކަމަށް ވެސް ބުނެފައިވެ އެވެ.
އޭނަގެ ބަންދަށް ކޯޓުން 10 ދުވަސް ޖެހީ ދޫކޮށްލައިފި ނަމަ މުޖުތަމައުގެ ސަލާމަތަށް ނުރައްކާވެދާނެތީ ކަމަށް ކޯޓުން ބުންޏެވެ. އަދި އޭނަ އަކީ ކުރިން ވެސް ހަތިޔާރު ބޭނުންކޮށްގެން މާރާމާރީ ހިންގުމުގެ ރެކޯޑްތަކެއް އޮތް މީހަކަށް ކޯޓުން ބުންޏެވެ.