ރާއްޖެ ވެސް ހިމެނޭ ކޮލަމްބޯ ސެކިއުރީޓީ ކޮންކްލޭވް (ސީއެސްސީ) ގެ މެންބަރު ގައުމުތަކުން ސީއެސްސީ ޗާޓަރާއި ސީއެސްސީގެ ސެކްރެޓޭރިއެޓް ގާއިމުކުރުމުގެ އެއްބަސްވުމުގައި އިއްޔެ ސޮއިކޮށްފި އެވެ.
ސްރީ ލަންކާގެ ކޮލަމްބޯގައި އިއްޔެ ބޭއްވި ރަސްމިއްޔާތެއްގައި އެއްބަސްވުމުގައި މެންބަރު ގައުމުތަކުގެ ފަރާތުން ސޮއިކުރެއްވި އިރު، އިންޑިއާގެ ފަރާތުން ސޮއިކުރެއްވީ ބޮޑުވަޒީރުގެ ނެޝަނަލް ސެކިއުރިޓީ އެޑްވައިޒަރު އަޖިތް ދޯވަލް ކޭސީ، ރާއްޖޭގެ ނޭޝަނަލް ސެކިއުރިޓީ އެޑްވައިޒަރު އިބްރާހީމް ލަތީފް، މޮރިޝަސް އިން ލަންކާއަށް ކަނޑައަޅުއްވާފައި ހުންނަވާ ހައި ކޮމިޝަނަރު ހޭމަންޑޯޔަލް ދިލުމް އަދި ސްރީލަންކާގެ ރައީސްގެ ނޭޝަނަލް ސެކިއުރީޓީ އެޑްވައިޒަރު ސަގަލަ ރަޓްނަޔަކަ އެވެ.
ސީއެސްސީގެ ދަށުން މެންބަރު ގައުމުތަކުން މައިގަނޑު ފަސް ކަމަކަށް އެއްބާރުލުން ދޭނެ އެވެ.
އެއީ ކަނޑުމަތީގެ ސަލާމަތާއި ރައްކާތެރިކަން ކަށަވަރުކުރުމާއި، ޓެރަރިޒަމާއި ހަރުކަށި ފިކުރާ ދެކޮޅަށް މަސައްކަތް ކުރުމާއި، ޓްރެފިކިން އަދި ގައުމުތަކުގެ ބޯޑަރުތައް ހުރަސްކޮށް ރާވައިގެން ހިންގާ ކުށްތައް ހުއްޓުވުމާއި، ސައިބާ ސެކިއުރިޓީއާއި އުމްރާނީ ވަސީލަތްތަކުގެ ރައްކާތެރިކަން ކަށަވަރުކުރުމަށް މަސައްކަތް ކުރުން އަދި އިންސާނީ އެހީތެރިކަމާއި ކާރިސާތަކާ ގުޅިގެން އެހީތެރިވެ ދިނުމެވެ.
އިއްޔެ ސޮއިކުރުމަށް ބޭއްވި ބައްދަލުވުމުގައި ކުރިއަށް ހުރި މަސައްކަތްތަކާއި، ކުރިއަށް އޮތް ތަނުގައި ކުރެވިދާނެ ކަންކަމާ ގުޅޭ ގޮތުން ވަފުދުގެ އިސްވެރިން މަޝްވަރާކުރެއްވި އެވެ.