ދުނިޔޭގެ މަޝްހޫރު ޕޭމަންޓް ސިސްޓަމް "ޕޭޕަލް" ގެ ހިދުމަތް ރާއްޖެ އަށް ތައާރަފު ކުރަން ސަރުކާރުން ކުރަމުން އަންނަ މަސައްކަތުގެ ތެރެއިން އެކަމަށް މިހާރުގެ ޕްރޮޕޯސަލް ހުށަހަޅާފައިވާ ކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެ އެވެ.
ދައުލަތުގެ މީޑިއާ ޕީއެސްއެމްގައި މިނިސްޓަރު ވިދާޅުވީ ގޮތުގައި "ޕޭޕަލް" އަށް ސަރުކާރުގެ ޕްރޮޕޯޒަލް ފޮނުވީ މީގެ ތިން ދުވަސް ކުރިން ކަމަށެވެ. މިނިސްޓަރު ވިދާޅުވި ގޮތުގައި މިކަމާ ގުޅޭ ގޮތުން ވަރަށް އަވަހަށް އެއްބަސްވުމަކަށް ވެސް އާދެވޭނެކަމުގެ އުންމީދު ބޮޑެވެ.
"ސީދާ އަޅުގަނޑު ނެތިން ދަންނަވާކަށް މިވެނި ދުވަހަކުއޭ ޕޭޕަލްގެ ހިދުމަތް ރާއްޖޭގައި ފެއްޓޭނީ،" ސައީދު ވިދާޅުވި އެވެ. "އެހެން ނަމަވެސް އިރާދަކުރެއްވިއްޔާ ޕޭޕަލް ރާއްޖެ އަށް ގެނެވޭނެ."
މިކަމާ ގުޅޭ ގޮތުން މިނިސްޓަރު މިދިޔަ މނަހު "ޕޭޕަލް" ގެ އިސްވެރިންނާ މަޝްވަރާތަކެއް ކުރައްވާފައިވެ އެވެ.
ރާއްޖެ އަޑް "ޕޭޕަލް" ގެނައުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދެކެވެ.
އެމެރިކާގެ ކުންފުންނެއް ކަމަށްވާ "ޕޭޕަލް" ވުޖޫދަށް އައީ މީގެ 25 އަހަރު ކުރިން 1998 ގަ އެވެ. އެއީ "ކޮންފިނިޓީ" ގެ ނަމުގަ އެވެ. އަދި "ޕޭޕަލް" އަށް ނަން ބަދަލުވީ 2000 ވަނަ އަހަރު އެވެ.
ސަރުކާރުން އަންނަނީ ޗައިނާގެ ޕޭމަންޓް ސިސްޓަމެއް ކަމަށްވާ "ވީޗެޓް ޕޭ" ގެ ހިދުމަތް ވެސް ރާއްޖޭގައި ދޭން މަސައްކަތްތަކެއް ކުރަމުންނެވެ. އެގޮތުން އެ ކުންފުންޏާ އެކީ އެއްބަސްވުމެއްގައި މި އަހަރު މެއި ސޮއިކޮޮށްފައިވެ އެވެ.