މި އަހަރުގެ ޓޫރިޒަމް ޕީކް ސީޒަނަށް މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް) ތައްޔާރުވާން ފަށައިފި އެވެ.
މި ތައްތާރީތަކުގެ ތެރެއިން ކުންފުނީގެ ފެސިލިޓީސް މެނޭޖްމަންޓް އެންޑް ޔުޓިލިޓީސް ޑިވިޝަން (އެފްއެމްޔޫޑީ) އިން އިއްޔެ ޚާއްސަ އިވެންޓެއް ވެސް ބާއްވާފައިވެ އެވެ.
"ވިންޓާ ޕްރެޕް ކިކްއޮފް 2024" ގެ ނަމުގައި ބޭއްވި އިވެންޓްގެ މަގުސަދަކީ ކުރިއަށް އޮތް ސީޒަނަށް ތައްޔާރުވުމުގެ ގޮތުން ކުރަން ރާވާފައިވާ ކަންކަން މެނޭޖްމެންޓާއި ޙިއްސާކޮށް ކުންފުނީގެ ލަނޑުދަނޑިތަކާއި އެއްގޮތްވާ ގޮތުގެ މަތިން މަސައްކަތްތައް ރާވައި އިންތިޒާމްކުރުމެވެ.
އެ އިވެންޓްގައި އެމްއޭސީއެލްގެ ސީއީއޯ/މެނޭޖިން ޑިރެކްޓަރު އިބްރާހިމް ޝަރީފް މުޙައްމަދާއި ޑެޕިއުޓީ މެނޭޖިން ޑިރެކްޓަރުން ކަމަށްވާ މުޙައްމަދު ލަމްޢާނާއި މުޖްތަބާ ލަތީފްގެ އިތުރުން ކުންފުނީގެ އިސް ބޭފުޅުން ބައިވެރިވެވަޑައިގެންނެވި އެވެ.
ވެލާނާ އިންޓަނޭޝަނަލް އެއާޕޯޓް (ވީއައިއޭ) އިން ޓޫރިޒަމްގެ މި އަހަރުގެ ޕީކް ސީޒަނަށް ތައްޔާރުވަމުން އަންނަ އިރު، އެންމެ ބޮޑު ސަމާލުކަމެއް ދެނީ، ފުރާ ފަސިންޖަރުންނާއި އެއާލައިންތަކަށް ފަސޭހަ އަދި ރަނގަޅު ޚިދުމަތްތަކެއް ދެވޭނެ ފަދަ މާހައުލެއް ޤާއިމް ކުރުމަށެވެ. އެގޮތުން މިހާރު ބޭނުންކުރާ ޓާމިނަލް ސަރަހައްދު ތަނަވަސްކޮށް، ކާރުބާރޫބޮޑުވުމުގެ މައްސަލަ ހައްލުކުރުމުގެ އިތުރުން މުޅި ފެސިލިޓީގައި ފިނިހޫނުމިން އެކަށީގެންވާ މިންވަރެއްގައި ބެހެއްޓުމާ އެކު ޓަރމިނަލް ރީތިކުރުމަށް ފެސިލިޓީސް މެނޭޖްމެންޓުން ވަނީ ފަށައިފަ އެވެ.
ރާއްޖެ އަށް ކޮންމެ އަހަރަކު ވެސް ޓޫރިސްޓުން އެންމެ ގިނައިން އަންނަނީ ޔޫރަޕްގެ ފިނި މޫސުމާ ދިމާކޮށާއި ކްރިސްމަހާ ދިމާކޮށް ނޮވެމްބަރާއި ޑިސެމްބަރު މަހުގެ ތެރޭގަ އެވެ.