ރާއްޖެ އާއި ތުރުކީގެ ފްރީ ޓްރޭޑް އެގްރީމަންޓް (އެފްޓީއޭ) ގެ އެއްބަސްވުން ސަރުކާރުން މިހާރު އެކުލަވާލާފައިވާ ކަމަށް އިކޮނޮމިކް އިކޮނޮމިކް މިނިސްޓަރު މުހައްމަދު ސައީދު ރޭ ވިދާޅުވެއްޖެ އެވެ.
ދައުލަތުގެ މީޑިއާ ޕީއެސްއެމްގައި މިނިސްޓަރު ރޭ ވިދާޅުވީ އެފްޓީއޭ އަށް އެއްބަސްވުމުގެ ޕްރިފަރެންޝަލް ޓްރޭޑް އެގްރީމަންޓް (ޕީޓީއޭ) އެކުލަވާލުމުގެ މަސައްކަތް މިދިޔަ ބުރާސްފަތި ދުވަހު ނިންމާލާފައިވާ ކަމަށެވެ. އެހެންވެ ދެން ކުރިއަށް އޮތީ ތުރުކީގެ ގާނޫނު ހަދާ މަޖިލީހަށް އެ އެއްބަސްވުން ހުށަހަޅައި ފާސްކުރުން ކަމަށް ވިދާޅުވި އެވެ.
ސައީދު ވިދާޅުވީ މި އަހަރުގެ ޑިސެމްބަރު ނުވަތަ އަންނަ އަހަރުގެ ޖެނުއަރީ 1 ހިސާބުގައި އެފްޓީއޭ އަށް އަމަލު ކުރަން ފެށޭނެ ކަމަށް ލަފާކުރެވޭ ކަމަށެވެ.
ރާއްޖެ އާއި ތުރުކީއާ ދެމެދު މިނިވަން ވިޔަފާރީގެ އެއްބަސްވުމެއް އެކުލަވައިލުމުގެ މަޝްވަރާތައް ފެށީ މި އަހަރުގެ މާޗު މަހުގެ ތެރޭގަ އެވެ. އަދި ތުރުކީއާ ގުޅުން ބަދަހި ކުރަން ރައީސް ޑރ. މުހައްމަދު މުއިއްޒުގެ ސަރުކާރުން އަންނަނީ ވަރަށް ބޮޑު އިސްކަމެއް ވެސް ދެމުންނެވެ. އެގޮތުން ތުރުކީގައި އަލަށް ރާއްޖޭގެ އެމްބަސީއެއް ވެސް ހުޅުވައި އެ ގައުމަށް ވަނީ ސަފީރަކު ވެސް އައްޔަންކޮށްފަ އެވެ.
ސަރުކާރުން ކުރިން ބުނެފައިވާ ގޮތުގައި ވަނީ މިނިވަން ވިޔަފާރީގެ އެއްބަސްވުމުގެ ދަށުން 214 ބާވަތަކުން ސުން ޕަސެންޓުގައި ތުރުކީ އަށް އެކްސްޕޯޓު ކުރެވޭނެ އިންތިޒާމުތައް ހަމަޖައްސާނެ އެވެ.
މިނިސްޓަރު ރޭ ވިދާޅުވެފައި ވަނީ،38 ބާވަތަކުން ޑިއުޓީ އެއްކޮށް ކަނޑާލަން ދިވެހި ސަރުކާރުން ތުރުކީ ސަރުކާރުގައި މިހާރު އެދިފައި އޮތް ކަމަށެވެ.
"ދެން ހުރި އައިޓަމްތަކުން ތުރުކީ އިން މިހާރު ނަގާ ޑިއުޓީ އަށް ވުރެ ވަރަށް ބޮޑު ތަން ކުޑަކޮށް ދިނީ،" އޭނަ ވިދާޅުވި އެވެ. "އެހެން ނަމަވެސް ޒީރޯ ޓެރިފްގައި ނުވަތަ ރާއްޖެ އިން ތުރުކީ އަށް އެކްސްޕޯޓްކުރާ އައިޓަމްތަކުގެ ތެރެއިން އެއްގޮތަކަށް ވެސް ޑިއުޓީ ދައްކަން ނުޖެހޭ 38 އައިޓަމެއް އަޅުގަނޑުމެންނަށް އެބައޮތް ލިބިފައި."
ތުރުކީއާ އެކީ މިނިވަން ވިޔަފާރީގެ އެއްބަސްވުމަކަށް ދާން ސަރުކާރުން މަސައްކަތް ކުރަމުން އަންނަ އިރު، ޗައިނާއާ އެކު 2018 ގައި އެއްބަސްވެފައިވާ މިނިވަން ވިޔަފާރީގެ އެއްބަސްވުމަށް ވެސް އަމަލު ކުރަން މިހާރު އޮތީ ނިންމައިފަ އެވެ.