މިދިޔަ އަހަރު ކުރީކޮޅު ވަޅިއަކުން ހަމަލާދީ އަހުމަދު މުހައްމަދު ދީދީ (ނައުއްޓެ) މަރާލި މައްސަލައިގައި ދައުވާ އުފުލި ދެ މީހުން ދައުވާތަކަށް އިންކާރުކޮށްފިއެވެ.
މިދިޔަ އަހަރުގެ 24 ފެބްރުއަރީގެ ރޭ މާފަންުނު 'ކްރާސާ' ފިހާރަ ތެރެއަށް ވަދެ ހަމަލާ ދިނުމުން ލިބުނު ޒަހަމުތަކަށް ފަރުވާދެމުން ދަނިކޮށް މަރުވެފައިވަނީ ހިތަދޫ އިޒުމީރު، އަހުމަދު މުހައްމަދުދީދީ (ނައުއްޓެ) އެވެ.
މި މައްސަލައިގައި ދައުވާ އުފުލާފައިވަނީ އިބްރާހީމް ފައިހް ނިޒާމު ސ. މަރަދޫފޭދޫ، ރަށްދެބައިގެ އަދި ސިރުހާން އަލީ ތ. ގާދިއްފުށި، ގުލޭނޫރައްމާގެ މައްޗަށެވެ. މި ދެމީހުންގެ މައްޗަށް އުފުލާފައިވަނީ ތޫނު އެއްޗެއް ބޭނުންކޮށްގެން ގަސްދުގައި މީހަކު މެރުމުގެ ކުށުގެ ދައުވާއެވެ.
މި މައްސަލައިގެ އަޑުއެހުމެއް މިއަދު ކްރިމިނަލް ކޯޓުގައި ކުރިއަށް ގެންދިޔައިރު، މިއަދުގެ އަޑުއެހުމުގައި ދައުލަތުން ވަނީ މި މީހުންގެ މައްޗަށް އުފުލާ ދައުވާ އިއްވާފައެވެ. އަދި މި ދެމީހުން ވެސް ވަނީ ދައުވާއަށް އިންކާރު ކުރާ ކަމަށް ކޯޓުގައި ބުނެފައެވެ.
ދެ މީހުން ދައުވާއަށް އިންކާރު ކުރުމުން ދައުލަތުން ވަނީ މި މީހުންނާއި ދެކޮޅަށް ހުށަހަޅާފައިވާ ހެކިތައް ހާމަކޮށްފައެވެ. އަދި އެ ހެކިތަކަށް ރިއާޔަތްކޮށް މި މައްސަލައަކީ މަދަނީ މިންގަނޑުން ކުރިއަށް ގެންދެވޭނެ މައްސަލައެއް ކަމަށް ވަނީ ނިންމާފައެވެ. މި މައްސަލައިގެ އިތުރު އަޑުއެހުމެއް މިމަހު ތެރޭގައި ބޭއްވުމަށް ވަނީ ނިންމާފައެވެ.
މި މައްސަލައިގައި ދައުވާ އުފުލާފައިވާ އިބްރާހީމް ފައިހް ނިޒާމު އަދި ސިރުހާން އަލީ ހުރީ ޝަރިއަތް ނިމެންދެން ބަންދު ކޮށްފައެވެ.