ހދ. ކުޅުދުއްފުށީގައި ފުލުހެއްގެ ކަންކަށިމަތީގައި ޖެހި މީހަކު ޖަލަށްލާން ހުކުމްކޮށް، އެ އަދަބު ގޭބަންދަށް ލުއިކޮށް ދީފި އެވެ.
މި އަހަރުގެ ކުރީކޮޅު ހިނގި ހާދިސާއާ ގުޅިގެން އެއް އަހަރާއި 12 ދުވަހަށް ޖަލަށް ހުކުމްކުރީ ކުޅުދުއްފުށި، ލަންދޫގޭ އަބްދުﷲ އިބްރާހީމެވެ. އޭނަގެ އިއުތިރާފުގެ މައްޗަށް ބިނާކޮށް، ކުށް ސާބިތުވުމުން އިއްވި ޖަލު ހުކުމް ކުޅުދުއްފުށީ މެޖިސްޓްރޭޓް ކޯޓުން ވަނީ ގޭބަންދު އަދަބަކަށް ލުއިކޮށް ދީފަ އެވެ.
ފުލުހަކަށް އިބްރާހީމް ހަމަލާ ދިނީ އޭނަގެ މައްޗަށް ކުރެވުނު ވައްކަމުގެ ތުހުމަތަކާ ގުޅިގެން ފުލުހުން މަގުމަތިން ހިފަހައްޓައި ސުވާލު ކުރުމުގެ ތެރޭގައެވެ. އެ މައްސަލައިގައި އޭނަގެ މައްޗަށް ދައުލަތުން ކުރީ އަނިޔާއެއް ދިނުމުގެ ކުށުގެ ދައުވާ އެވެ.
ޝަރީއަތުގައި އަބްދުﷲ ވަނީ ފުލުހަކަށް ހަމަލާދިން ކަމަށް އިއުތިރާފުވެފަ އެވެ. އެހެންވެ މައްސަލަ ކުރިއަށް ގެންގޮސްފައި ވަނީ އަވަސް ނިޔާގެ މައްސަލައެއްގެ ގޮތުގަ އެވެ.
އަބްދުﷲ އަކީ ކުރިން ބަނގުރާ ބުއިމުގެ ކުށުގެ ދައުވާއެއް ވެސް ސާބިތުވެފައިވާ މީހެކެވެ އެވެ. އެގޮތުން އަމިއްލަ އަށް ބޮގަރު ކައްކައިގެން ބުއި މައްސަލައާ ގުޅިގެން އޭނާގެ މައްޗަށް އިއްވީ 40 އެތިފަހަރުން ޖަލްދުކުރުމާއެކު 13 ދުވަހުގެ ޖަލު ހުކުމެކެވެ.