ރާއްޖޭގައި ހުރި ބައެއް އެމްބަސީތައް ކައިރީގައި އަޑުއުފުލާ ފުލުހުންގެ ވާޖިބު އަދާކުރުމަށް ހުރަސްއެޅި މައްސަލައިގައި ހައްޔަރު ކުރި ދެ މީހުންގެ ބަންދު މުއްދަތު އިތުރު ކޮށްފިއެވެ.
މި މައްސަލައިގައި އޮގަސްޓް 28 ވަނަ ދުވަހު ހައްޔަރު ކޮށްފައިވަނީ ޑރ. މުހައްމަދު އިޔާޒުގެ އަނބިކަނބަލުން އާއިޝަތު ޝާދިޔާ އާއި ޑރ. ޝަޒްރާ އިބްރާހީމެވެ.
ކޯޓު އަމުރެއްގެ ދަށުން މި ދެމީހުން ހައްޔަރު ކޮށްފައިވާއިރު، މި ދެމީހުންގެ ބަންދަށް ފުރަތަމަ ދީފައިވަނީ 3 ދުވަހުގެ މުއްދަތެކެވެ. ފުލުހުން މިއަދު ބުނެފައިވަނީ، މި ދެމީހުންގެ ބަންދާމެދު ގޮތެއް ކަނޑައެޅުމަށް ކޯޓަށް ހާޒިރު ކުރުމުން އިތުރު 5 ދުވަހު ބަންދުގައި ބެހެއްޓުމަށް އަމަރު ކޮށްފައިވާ ކަމަށެވެ.
މި މައްސަލައިގައި ނެރުނު ބަޔާނެއްގައި ފުލުހުން ބުނެފައިވަނީ، ސުލްހަވެރިކަމާއެކު އެއްވެއުޅުމުގެ މިނިވަންކަމުގެ ގާނޫނާ ހިލާފަށް، އާއިޝަތު ޝާދިޔާ އާއި ޑރ. ޝަޒްރާ އިބްރާހީމް ޑިޕްލޮމެޓިކް މިޝަންތަކުގެ ކައިރިއަށް ތަކުރާރުކޮށް އެއްވެ އަޑުގަދަކުރާ ބޭނުންކޮށްގެން ހަޅޭލެވުމާއި ބޭއަދަބީ ބަހުރުވައިން މުއާމަލާތްކޮށް ޑިޕްލޮމެޓިކް މިޝަންތަކުގެ މަސައްކަތަށް ހުރަސް އެޅޭގޮތަށް އަމަލުކުރުމުގެ އިތުރުން ވަކި ސަފީރަކަށް އުނދަގޫ ކުރުމުގެ އަމަލުތަކެއް ހިންގަމުން ގެންދިއުމާ ގުޅިގެން، އެސަރަހައްދުން ދިއުމަށް ފުލުހުން އެންގުމުންވެސް އެކަމަށްވެސް އިންކާރުކޮށް ފުލުހުންގެ ވާޖިބު އަދދާކުރުމަށް ހުރަސްއަޅާފައިވާ ކަމަށެވެ. ފުލުހުން ބުނެފައިވަނީ މި މީހުން ހައްޔަރު ކުރުމުގެ ކުރިން މި އަމަލުތައް ތަކުރާރު ނުކުރުމަށް އެމީހުންނަށް ތަކުރާރުކޮށް ނަސޭހަތްދީފައިވާ ކަމަށެވެ.