އައްޑޫ ލިންކް ރޯޑްގައި ހުރި ވަޅުގަނޑުތަކަށް ތާރު އަޅައިގެން މަރާމާތު ކުރުމުގެ މަސައްކަތް ފަށައިފި އެވެ.
އެ މަސައްކަތް ކުރިއަށް ގެންދަނީ އިދާރީ ދާއިރާތަކާ ބެހޭ މިނިސްޓްރީގެ ޕަބްލިކް ވޯކްސް ޔުނިޓާއި އައްޑޫ ސިޓީ ކައުންސިލް ގުޅިގެންނެވެ.
ލިންކް ރޯޑްގައި ހުރި ވަޅުގަނޑުތައް މަރާމާތު ކުރަން ފެށި އިރު، އެ މަގުގައި ދުއްވަން ދަތިވާ ވަރަށް މަގު ވަރަށް ބޮޑަށް ހަލާކުވެފައިވެ އެވެ. ކުރިން ވެސް ލިންކް ރޯޑް ވަރަށް ބޮޑަށް ހަލާކުވެފައިވާ އިރު، މަގުގެ ހާލަތު މި ފަހުން މާ ބޮޑަށް ދަށްވީ އައްޑޫގެ މަގުތައް ހަދަން ކުރިަށް ގެންދާ މަޝްރޫއުގެ ތެރެއިން ބަރު ވެހިކަލްތައް ވަރަށް އާންމުކޮށް ދުއްވުމުގެ ސަބަބުންނެވެ.
ގަމާއި ފޭދޫ ގުޅޭ ހިސާބުން ފެށިގެން ހިތަދޫ ސްކޫލާ ހަމައަށް ތާރު އަޅައިގެން ހަދައިފައި އޮތް ލިންކް ރޯޑްގެ އެކި ހިސާބުތަކުން ތާރުގަނޑު ކަނޑައިގެން ގޮސް ވަޅުގަނޑު ހެދުމަކީ ވަރަށް އާންމުވެފައި އޮތް މައްސަލައެކެވެ. އެގޮތުން އެކި ފަހަރު މަތިން ތާރު އަޅައިގެންނާއި ވަގުތީ ގޮތުން ވެލި އަޅައިގެންނާއި ކޮންކްރީޓް އަޅައިގެން ވެސް ވަޅުގަނޑުތައް މަރާމާތުކޮށްފައިވެ އެވެ.
މި މަގުގެ ހާލަތާ މެދު އައްޑޫ ސިޓީ ކައުންސިލުން ހުއްޓުމެއް ނެތި ކަންބޮޑުވުން ފާޅުކުރަމުންދާ އިރު، މި ސަރުކާރުން ބުނެފައިވާ ގޮތުގައި ލިންކް ރޯޑް ރަނގަޅު ފެންވަރަކަށް ހަދަން މަޝްރޫއެއް ކުރިއަށް ގެންދާނެ އެވެ.
އައްޑޫގެ މީހުން އުޅޭ ހަތަރު އަވަށް ގުޅިފައި އޮންނަ ރެކޯޑް ހަދައި ހުޅުވީ 2003 ގަ އެވެ.