ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) ގެ ދަށަށް ފަހި ދިރިއުޅުން ކޯޕަރޭޝަން (އެފްޑީސީ) ބަދަލުކޮށް، ރާއްޖޭގައި ބޯހިޔާވަހިކަމުގެ މަޝްރޫޢުތައް ދެން އެ ކުންފުނީގެ ދަށުން ކުރިއަށް ގެންދާ ގޮތަށް ހަމަޖައްސައިފި އެވެ.
އެޗްޑީސީގެ ދަށުން ހިންގާ ސަބްސިޑަރީޢަކަށް އެފްޑީސީ ބަދަލުކުރީ މިއަދު ބޭއްވި ކެބިނެޓް ބައްދަލުވުމުގަ އެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ހައުސިން މިނިސްޓަރު ޑރ. އަލީ ހައިދަރު ވިދާޅުވީ އެފްޑީސީ އަކީ މިހާރު ވެސް އަސާސީ ބޯހިޔާވަހިކަމުގެ ބޮޑު މަޝްރޫޢެއް ހިންގާ ކުންފުންނެއް ކަމަށެވެ. އަދި އެޗްޑީސީގެ ދަށަށް އެ ކުންފުނި ބަދަލުކުރުމުން، ރާއްޖޭގެ ހުރިހާ ހިސާބެއްގައި ކުރިއަށް ގެންދާ އަސާސީ ބޯހިޔާވަހިކަމުގެ ހުރިހާ މަޝްރޫޢެއް ވެސް ދެން ހިންގާނީ އެފްޑީސީން ކަމަށް ވިދާޅުވި އެވެ.
އެފްޑީސީގެ މެނޭޖިން ޑިރެކްޓަރަކީ ހަމްދާން ޝަކީލެވެ.
"ހަމައެކަނި ހުޅުމާލޭގައެއް ނޫން އެފްޑީސީން ހައުސިން މަސައްކަތް ކުރިއަށް ގެންދާނީ. މުޅި ރާއްޖޭގައި ބޯހިޔާވަހިިކަމުގެ މަޝްރޫޢުތައް ކުރިއަށް ގެންދިއުމުގައި އެންމެ ބޮޑު ދައުރެއް އަދާކުރާނީ އެފްޑީސީން." ހައިދަރު ވިދާޅުވިއެވެ.
މިނިސްޓަރު ވިދާޅުވީ މި ބަދަލާއެކު އެޗްޑީސީ މީގެ ފަހުން މަސައްކަތްކުރާނީ މާސްޓަ ޑިވެލޮޕަރެއްގެ ގޮތުގައި ކަމަށެވެ. އަދި ރާއްޖޭގެ އެކި ސަރަހައްދުތަކުގައި ކުރިއަށް ގެންދާ އާބަން ސެންޓަރުތަކުގެ މާސްޓަ ވެލޮޕަރަކީ ވެސް އެޗްޑީސީ ކަމަށް ހައިދަރު ވިދާޅުވި އެވެ.
މިނިސްޓަރު ވިދާޅުވީ ރައީސް ޑރ. މުހައްމަދު މުއިއްޒުގެ ވިސްނުމަކީ އެޗްޑީސީ އަކީ ޕަބްލިކް ކުންފުންޏަކަށް ބަދަލުކޮށް، އާއްމުންނަށް ހިއްސާ ވެސް ވިއްކުން ކަމަށެވެ.