ވަޒީފާއާ ބެހޭ ޤާނޫނަށް 8 ވަނަ އިޞްލާޙު ގެނައުމުގެ ބިލު ރައީސް ޑރ. މުޙައްމަދު މުޢިއްޒު ތަސްދީޤު ކުރައްވައިފި އެވެ.
މި ބިލަކީ، މިދިޔަ މަހުގެ 19 ގައި ބޭއްވި ރައްޔިތުންގެ މަޖިލީހުގެ ޖަލްސާ އިން ފާސްކުރި ބިލެކެވެ. ބިލުގައި، ބިދޭސީންނަށް ރާއްޖޭގައި ވަޒީފާއަދާ ކުރެވޭނީ، ވަޒީފާއާ ބެހޭ ޤާނޫނާއި އެ ޤާނޫނުގެ ދަށުން ހަދާ ގަވާއިދުގައިވާ ގޮތުގެ މަތިން ރާއްޖޭގައި މަސައްކަތްކުރުމުގެ ހުއްދަ ހޯދުމަށް ފަހު ކަމަށް ބަޔާންކޮށްފައިވެ އެވެ.
ނަމަވެސް ވަކި ފަރާތްތަކަކަށް މި އުސޫލު ނުހިނގާނެ ކަމަށާއި އެ ފަރާތްތައް މި ބިލުގައި ބަޔާންކޮށްފައިވެ އެވެ. ބިލުގައި ރާއްޖެއަށް ބިދޭސީން ގެނެވޭނެ ޢަދަދާއި ދާއިރާތައް ވެސް ކަނޑައަޅާފައިވެ އެވެ.
ޤާނޫނަށް ގެނެވުނު އިސްލާހުތަކުގެ ތެރޭގައި ރާއްޖޭގައި ވަޒީފާއަދާ ކުރުމަށް ބިދޭސީން ގެނައުމުގައި ވަޒީފާދޭ ފަރާތުން ފުރިހަމަކުރަން ޖެހޭ ކަންކަން އިތުރުކުރައްވައި ތަފްސީލުކޮށް ބަޔާންކޮށްފައިވެ އެވެ. އެގޮތުން އެ ބިދޭސީއަކު މަސައްކަތް ކުރާނެ ވާކްސައިޓް ރަޖިސްޓަރީކުރުމާއި، ކަމާ ގުޅޭ އެނޫން ވެސް ހުއްދަތައް ހޯދުމާއި، އެ ބިދޭސީއަކު ގެނައުމަށް ބޭނުންވާ ކޯޓާ ހޯދުމާއި ވަރކް ޕާމިޓް ހެއްދުން ހިމެ ނެއެވެ.
މީގެ އިތުރުންވެސް ބިދޭސީ މަސައްކަތްތެރިންނާ މެދު އިހުމާލުވާ ފަރާތްތަކާމެދު އަޅާނެ ފިޔަވަޅު ވެސް ބަޔާންކޮށްފައި ވެއެވެ.
ރައީސް މި ބިލު ތަސްދީޤުކުރެއްވުމާ ގުޅިގެން ޤާނޫނުގެ ދަށުން އެކުލަވާލާފައިވާ ގަވާއިދުތަކަށް ގެންނަން ޖެހޭ އިޞްލާޙުތައް، މި ޤާނޫނަށް ޢަމަލުކުރަން ފަށާ ތާރީޚުން ފެށިގެން 3 މަސްދުވަހުގެ ތެރޭގައި އެކުލަވާލައި، ސަރުކާރުގެ ގެޒެޓުގައި ޝާއިޢުކުރަންވާނެ ކަމަށް ބަޔާންކޮށްފައި ވެއެވެ.