ބިދޭސީންގެ ފީތައް ނުދައްކާ ވިޔަފާރިތަކަށް އެ ފައިސާ ދެއްކުމަށް ދިން މުއްދަތު އަނެއްކާ ވެސް އިތުރުކޮށް، ބަހާލައިގެން ފައިސާ ދެއްކޭނެ ފުރުސަތު ހޯމްލޭންޑް މިނިސްޓްރީން ހަމަޖައްސައިފި އެވެ.
ރާއްޖޭގައި ވަޒީފާ އަދާކުރަން ބިދޭސީންގެ ފީތަކާއި ޖޫރިމަނާ 100،000ރ. އަށް ވުރެ މަތި ކުންފުނިތަކަށް މިދިޔަ މަހުގެ 31 ގެ ކުރިން ފައިސާ ދައްކަން މިނިސްޓްރީން ދިން މުހުލަތު މިހާރު އިތުރުކޮށްފައިވާ ކަމަށް މިނިސްޓްރީން ބުންޏެވެ. މިއީ މުއްދަތު އިތުރުކޮށްދިން ތިންވަނަ ފަހަރެވެ.
މިނިސްޓްރީން ނެރުނު އިއުލާނެއްގައި ބުނީ ބިދޭސީންގެ ފީތަކާއި ޖޫރިމަނާތައް ނުދައްކާ ފަރާތްތަކަށް އެ ފައިސާ ދައްކަން ދިން މުއްދަތު ދެން ހަމަވާނީ މި މަހުގެ 16 އަށް ކަމަށެވެ. އަދި އެ މުއްދަތުގައި ފައިސާ ދައްކާ ހަލާސްނުކޮށްފި ނަމަ އެކްސްޕެޓް ސިސްޓަމް މެދުވެރިކޮށް އެ ފަރާތްތައް ސަސްޕެންޑްކޮށް އައު ހުއްދަތައް ދޫކުރުން މެދުކަނޑާލެނެ ކަމަށް ވެސް މިނިސްޓްރީން ބުންޏެވެ.
"އެކްސްޕެޓް ސިސްޓަމް މެދުވެރިކޮށް ވަކި މުއްދަތެއްގެ ތެރޭގައި ދައްކަން ޖެހޭ ފައިސާ ދައްކާ ހަލާސްކުރުމަށް ސަރުކާރާއެކު އެއްބަސްވުމަކަށް އައުމުގެ ފުރުސަތު ލިބޭނެ." މިނިސްޓްރީން ބުންޏެވެ. "މި އެއްބަސްވުމުގެ މުއްދަތާއި އިތުރު މައުލޫމާތު އެކްސްޕެޓް ސިސްޓަމުން ލިބެން ހުންނާނެ."
ބިދޭސީންގެ ފީތައް ނުދައްކައިގެން 1،026 ކުންފުންޏެއްގެ ނަން ދާދި ފަހުން އާންމުކުރި އެވެ. އޭ ތެރެއިން 123 ކުންފުންޏަކުން ދައުލަތަށް ދައްކަން ޖެހޭ އަދަދު އެއް މިލިއަނަށް ވުރެ ގިނައިރު ބައެއް ކުންފުނިތަކުން ދައްކަން ޖެހޭ ފައިސާގެ އަދަދު އުޅެނީ 26 މިލިއަނަށް ވުރެ މަތީގައެވެ.
ލިސްޓު އާއްމުކުރުމުން 20 ކުންފުންޏަކުން ފައިސާ ދައްކާފައިވެ އެވެ. އެގޮތުން ދެއްކި ފައިސާގެ އަދަދު 182 މިލިއަނަށް އަރަ އެވެ.