"ބިންވެރިޔާ" ސްކީމްގެ ދަށުން ހުޅުމާލެއިން ދޫކުރަން ނިންމި ގޯތިތަކުގެ ތެރެއިން އިތުރު 23 ގޯތި އެ ލިބުނު ފަރާތްތަކާ ހަވާލުކޮށްފައިވާ ކަމަށް ހައުސިން މިނިސްޓްރީން ބުނެފި އެވެ.
އެ މިނިސްޓްރީން ބުނީ މިދިޔަ މަހުގެ 29 ގައި 13 ގޯއްޗެއް އަދި އިއްޔެ 10 ގޯއްޗެއް ހަވާލުކޮށްފައިވާ ކަމަށެވެ.
މިހާތަނަށް "ބިންވެރިޔާ" ގެ ދަށުން ހުޅުމާލެ އިން ޖުމްލަ 648 ގޯތި ހަވާލުކޮށްފައިވާ ކަމަށް ވެސް މިނިސްޓްރީން ބުންޏެވެ. މި ސްކީމްގެ ދަށުން ހުޅުމާލެއިން ޖުމުލަ 1408، ގޯތި ދޫކުރެވިފައިވާ އިރު، އަދިވެސް 761 ގޯއެއް ހަވާލެއް ނުކުރެވެ އެވެ.
މިނިސްޓްރީން ބުނީ ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ބިންތައް ސާފުކޮށް މިނިސްޓްރީއާ ހަވާލުކުރާ ހިސާބުން، ބިންތައް ހަވާލުކުރުމުގެ މަސައްކަތް ކުރިއަށް ދާނެ ކަމަށެވެ.
ކުރީގެ ސަރުކާރުން ފެށި "ބިންވެރިޔާ" ސްކީމްގެ ދަށުން ގުޅީފަޅާއި، ގިރާވަރުފަޅުން ލިބިފައިވާ ގޯތިތައް ހަވާލުކުރުމަށްޓަކައި ލޭންޑްޔޫޒް ޕްލޭން ރިވިއުކޮށް ހިއްކުމުގެ މަސައްކަތް މިހާރު އަންނަނީ ކުރަމުންނެވެ.