މީހަކަށް ބިރުދައްކާ އިންޒާރުދިން މައްސަލައެއްގައި ހައްޔަރު ކުރި ދެ މީހެއްގެ ބަންދަށް 5 ދުވަސް ޖަހައިފިއެވެ.
މިމައްސަލައިގައި ހައްޔަރު ކޮށްފައިވަނީ މ. ހެޕީލައިފް، މާލެ އަހުމަދު އީމާން މުހައްދު އަދި މއ. މާވެޔޮގެ، މާލެ ވިކާޝް އަހުމަދެވެ.
ޖަމާއަތް ހަދައިގެން މާރާމާރީ ހިންގުމާއި ބިރުދެއްކުމާއި އިންޒާރުދިން ކަމުގެ ތުހުމަތުގައި މި ދެމީހުން ހައްޔަރުކޮށް ބަންދު މުއްދަތު ޖަހަން ގެންދިއުމުން އޮގަސްޓް 31 ވަަނަ ދުވަހު ކްރިމިނަލް ކޯޓުން ވަނީ މި ދެ މީހުންގެ ބަންދަށް 5 ދުވަސް ދީފައެވެ.
މި މީހުންގެ ބަންދަށް 5 ދުވަސް ދީފައިވަނީ، ތުހުމަތުތަކަށް އިންކާރުކޮށް ވަކީލެއްގެ ފުރުސަތަށް އެދިފައިވާތީ ޖިނާއީ އިޖުރާއަތުގެ ގަވައިދުގެ ދަށުންނެވެ.
މި މީހުންގެ ބަންދު އަމުރުގައި ބުނެފައިވަނީ މި މައްސަލަ ހިންގާފައިވަނީ އާންމު ފަރުދުންގެ ހިތްތަކުގައި ބިރުވެރިކަން އުފެދޭގޮތަށް ޖަމާއަތް ހަދައިގެންކަން ފުލުހުން ހުށަހެޅި ލިޔެކިޔުންތަކަށް ބެލުމުން އެނގޭ ކަމަށެވެ.
މި ދެމީހުން އިންޒާރުދީ ބިރުދައްކާފައިވަނީ މައްސަލައެއްގައި ހިމެނޭ ދައުލަތުގެ ހެއްކަކަށެވެ.