ރާއްޖޭގެ އިގުތިސާދު ސިންދަފާތު ކުރަން ކުރިއަށް ގެންދާ މަސައްކަތުގެ ތެރެއިން "އިންވެސްޓަ ރެސިޑަންސީ" ޕްރޮގްރާމެއް ތަޢާރުފު ކުރަން ސަރުކާރުން ނިންމައިފި އެވެ.
ކެބިނެޓްގެ މަޝްވަރާގެ މަތިން ރައީސް ޑރ. މުހައްމަދު މުއިއްޒު އެގޮތަށް ނިންމެވީ އެކަމާ ގުޅޭ ގޮތުން އިކޮނޮމިކް ޑިވެލޮޕްމަންޓް އެންޑް ޓްރޭޑުން ކެބިނެޓަށް ހުށަހެޅުއްވި ކަރުދާހަށް މަޝްވަރާ ކުރެއްވުމަށް ފަހު އެވެ.
އެ ނިންމުމާ ގުޅިގެން އިގުތިސާދު ސިންދަފާތުކުރުމަށް ރިއަލް އެސްޓޭޓް ސިނާއަތް ކުރިއެރުވުމަށްޓަކައި، ވިޔަފާރި ޙަރަކާތެއްގެ ގޮތުގައި ޕަާލް ވިސާ ޕްރޮގްރާމް ކުރިއަށް ގެންދެވުމަށް ވަނީ ހަމަޖައްސައިފަ އެވެ.
އެ ޕްރޮގްރާމް ކުރިއަށް ގެންދިއުމާ ގުޅޭ އެންމެހައި ކަންކަން ފޮރިން މިނިސްޓަރާއި އާއި ހޯމްލޭންޑް މިނިސްޓްރާއި އިކޮނޮމިކް މިނިސްޓަރާއި އާއި، އެޓާނީ ޖެނެރަލާއި ޓޫރިޒަމް މިނިސްޓަރުގެ އިތުރުން ހައުސިން މިނިސްޓަރު ހިމެނިވަޑައިގަންނަވާ ކޮމިޓީއަކުން ކުރިއަށް ގެންދަން ނިންމާފައިވެ އެވެ.
ރައީސް އޮފީހުގައި އިއްޔެ ބޭއްވި ނޫސްވެރިންގެ ބައްދަލުވުމުގައި އިކޮނޮމިކް މިނިސްޓަރު މުހައްމަދު ސައީދު ވިދާޅުވީ އަލަށް ތައާރަފު ކުރާ ރެސިޑެންސް ޕްރޮގްރާމަކީ ވަރަށް ކާމިޔާބު ކަމަކަށް ވާނެ ކަމަށެވެ. އެގޮތުން މީގެ ސަބަބުން މީގެ ސަބަބުން ފަސް އަހަރުގެ ތެރޭގައި ހަތް ބިލިއަން ޑޮލަރާ ހިސާބަށް އިންވެސްޓްމެންޓް ގެެނެވޭނެ ކަމަށް ވިދާޅުވި އެވެ.