ރާއްޖޭގެ ދެކުނުގެ ސަރަހައްދުގައި ފުޓްބޯޅަ މުބާރާތެއް ބޭއްވުމަށް ސްޓޭޓް ޓްރޭޑިން އޮގަނައިޒޭޝަން (އެސްޓީއޯ) އަތުން ސްޕޯންސާޝިޕްގެ ގޮތުގައި ނެގި 1.5 މިލިއަން ރުފިޔާ އަނބުރާ ދެއްކުމަށް ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ މައްޗަށް ސިވިލް ކޯޓުން ހުކުމް ކޮށްފިއެވެ.
ސިވިލް ކޯޓުން މިގޮތަށް ހުކުމް ކޮށްފައިވަނީ އިއްޔެއެވެ. އެސްޓީއޯއިން އެފްއޭއެމްއާ ދެކޮޅަށް ހުށަހެޅި މައްސަލައިގައި ބުނެފައިވަނީ، އެފްއޭއެމްއިން ކުރިއަށް ގެންދާ "ދިވެހި ލީގު"ގެ ބައެއްގެ ގޮތުގައި ރާއްޖޭގެ ދެކުނުގެ ސަރަހައްދުގައި "އެސްޓީއޯ ސައުތު ލީގު"ގެ ނަމުގައި ފުޓްބޯޅަ މުބާރާތެއް ބޭއްވުމަށް 2022 އޮކްޓޫބަރު 18 ވަނަ ދުވަހު އެ ދެފަރާތުގެ މެދުގައި ވެފައިވާ އެއްބަސްވެފައިވާ ކަމަށާއި އެ މުބާރާތް ރާވައި އިންތިޒާމުކޮށް ހިންގުމަށް ސްޕޮންސާޝިޕްގެ ގޮތުގައި އެސްޓީއޯއިން އެފްއޭއެމްއަށް 1.5 މިލިއަން ރުފިޔާ ދައްފައިވާ ކަމަށެވެ.
ތިން ޕޭމަންޓަކަށް ބަހާލައިގެން މި ފައއިސާ ދައްކާފައިވާނެ ކަމަށް އެސްޓީއޯއިން ފާހަގަ ކޮށްފައިވެއެވެ. އެގޮތުން 2022 އޮކްޓޫބަރު 23 ގައި 700،000 ރުފިޔާ، 2022 ނޮވެމްބަރު 28 ގައި 400،000 ރުފިޔާ އަދި 2022 ޑިސެންބަރު 29 ގައި 400،000 ރުފިޔާ ދައްކާފައިވާ ކަމަށެވެ. އެސްޓީއޯއިން ބުނެފައިވަނީ މިފައިސާ ދައްކާފައި ވީނަމަވެސް އެއްބަސްވުމުގެ ޝަރުތުތަކާ އެއްގޮތަށް މުބާރާތް ބާއްވާފައި ނުވާ ކަމަށެވެ.
އެސްޓީއޯއިން މި މައްސަލައިގައި އެދިފައިވަނީ ސްޕޮންސާގެ ގޮތުގައި އެފްއޭއެމްއަށް ދިން 1.5 މިލިއަން ރުފިޔާ އަނބުރާ ހޯދުމަށެވެ.
ސިވިލް ކޯޓުން ބުނެފައިވަނީ މި މައްސަލައިގެ ލިޔެކިޔުން އެފްއޭއެމްއަށް ހަވާލު ކުރުމަށް މަސައްކަތް ކުރެވުނުނަމަވެސް އެފްއޭއެމްގެ ފަރާތުން ކޯޓަށް ހާޒިރުވެފައި ނުވާ ކަމަށެވެ. އެހެންކަމުން މައްސަލަ ކުރިއަށް ގެންގޮސްފައިވަނީ އެފްއޭއެމްގެ ޣައިރު ހާޒިރުގައި، މައްސަލައަށް އެފްއޭއެމްއިން އިންކާރުކުރާ ކަމުގައި ބަލައިގެންނެވެ.
މައްސަލައިގައި އެސްޓީއޯއިން ބުނެފައިވަނީ އެފްއޭއެމްގެ ފަރާތުން ހުށަހަޅާފައިވާ ޕްރޮޕޯސަލްގައި މުބާރާތް ފަށާނެކަމަށް ބަޔާންކޮށްފައިވަނީ 2022 ޑިސެމްބަރު 4 ވަނަ ދުވަހު ކަމަށެވެ. އެހެންނަމަވެސް އެ މުބާރާތް ފެށިފައިނުވާ ކަމަށާއި އަދި ބޭއްވޭނެ ތާރީހެއްވެސް އެފްއޭއެމްއިން އެސްޓީއޯއަށް އަންގާފައިނުވާ ކަމަށެވެ. އަދި މިކަމުގައި ފޮނުވި ސިޓީއަށްވެސް އެފްއޭއެމްއިން ޖަވާބެއް ދީފައި ނުވާކަމަށް ބުނެފައިވެއެވެ.
މި މައްސަލައިގައި ހުށަަހަޅާފައިވާ ހެކިތަކަށް ރިއާޔަތްކޮށް، ސިވިލް ކޯޓުން ވަނީ އެސްޓީއޯ އަދި އެފްއޭއެމްގެ ދެމެދުގައި ވެފައިވާ އެއްވަސްވުމަށް އެފްއޭއެމްއިން ހިލާފުވެފައިވާ ކަމަށް ކަނޑައަޅައިފައެވެ. އަދި "އެސްޓީއޯ ސައުތު ލީގު"ގެ ނަމުގައި ފުޓްބޯޅަ މުބާރާތެއް ބޭއްވުމަށް ސްޕޮންސާގެ ގޮތުގައި ދީފައިވާ 1.5 މިލިއަން ރުފިޔާ 2024 ސެޕްޓެމްބަރު 15 ގެ ކުރިން ސިވިލް ކޯޓަށް ދައްކައި ހަލާސް ކުރުމަށް އެފްއޭއެމްގެ މައްޗަށް ހުކުމް ކޮށްފައިވެއެވެ.