ބޮޑުކަންނެލި މަސްވެރިންގެ ކަންބޮޑުވުންތަށް ހައްލު ކޮށްދިނުމަށް މަސައްކަތް ކޮށްދެއްވާނެކަމުގެ ޔަގީންކަން ރައީސް ޑރ. މުހައްމަދު މުއިއްޒު އަރުވައިފިއެވެ.
ރައީސް މުއިއްޒު މިއަދު ވަނީ ބޮޑުކަންނެލި މަސްވެރިންގެ ޔުނިއަންއާ ބައްދަލުކޮށްފައެވެ.
މި ބައްދަލުވުމާ ގުޅޭގޮތުން އެ ޔޫނިއަނުން މިއަދު ބުނެފައިވަނީ އެ ޔޫނިއަންގެ ހިންގާ ކޮމިޓީއިން ރައީސުލްޖުމްހޫރިއްޔާ ގެ އެދިލެއްވުމަށް މިއަދު ބައްދަލު ކުރި ކަމަށެވެ. އަދި ޖުމްލަކޮށް ކަންނެލި މަސްވެރިންގެ ހުރިހާ ކަންބޮޑުވުމެއް ރައީސްއާ ހިއްސާ ކުރެވުނު ކަމަށް ބުނެފައިވެއެވެ.
ބޮޑުކަންނެލި މަސްވެރިންގެ ޔޫނިއަނުން ބުނެފައިވަނީ އެ ޔޫނިއަންގެ ޑިމާންޑަށް ލޭނު އެޅުންހުއްޓާލަން ނިންމި ނިންމުމަށް މަރުހަބާ ދެންނެވި ކަމަށެވެ.
"އަދި ކަންނެލި މަސްވެރިންގެ ކަންބޮޑުވުންތަށް ހައްލު ގެނެސްދެއްވަން މަސައްކަތް ކުރާނެ ކަމުގެ ޔަގީންކަން ރައީސް ދެންނެވި." ބޮޑުކަންނެލި މަސްވެރިންގެ ޔޫނިއަނުން ބުނެފައިވެއެވެ.
މި ބައްދަލުވުމާ ގުޅޭގޮތުން ރައީސް އޮފީހުން ބުނެފައިވަނީ، މިފަދަ ބައްދަލުވުމެއްގެ ބޭނުމަކީ ރައްޔިތުންނާ ގާތުން ރައްޔިތުން އެދޭގޮތަށް ސަރުކާރުގެ ކަންކަން ކުރިއަށް ގެންދިއުންކަމުގައި ރައީސް މުއިއްޒު ވިދާޅުވި ކަމަށެވެ. އަދި މެނިފެސްޓޯގައި ހުރި ކަންކަން ކުރިއަށްގެންދިއުމަށް މަސައްކަތް ކުރައްވާކަމަށާއި، އެކަންކަން ނިމުމުން މަސްވެރިކަމުގެ ސިނާއަތަށް ޖުމްލަ ގޮތެއްގައި ހައްލެއް ލިބިގެންދާނެކަމުގައިވެސް ފާހަގަ ކުރެއްވިއެވެ.
މިއަދުގެ ބައްދަލުކުރެއްވުމުގައި ރައީސް މުއިއްޒު އާއި މިނިސްޓަރ އޮފް ފިޝަރީޒް އެންޑް އޯޝަން ރިސޯސަސް އަދި މިނިސްޓްރީގެ ކަމާ ގުޅޭ އިސް ބޭފުޅުން ބައިވެރިވެވަޑައިގަތެވެ. އަދި ބީ.ކޭ.އެމް.ޔޫގެ މެންބަރުން މި ބައްދަލުކުރެއްވުމުގައި ފާހަގަކުރެއްވި ކަންބޮޑުވުންތަކަށް ގެނެވެންހުރި ހައްލުތަކާ ގުޅޭގޮތުން މަޝްވަރާ ކުރެވުނު ކަމަށާއި، އަދި މި ބައްދަލުކުރެއްވުމުގައި ބީ.ކޭ.އެމް.ޔޫގެ މެންބަރުން ފާހަގަކުރެއްވި ކަންކަމަށް ހައްލު ހޯއްދަވައިދެއްވުމަށް މަސައްކަތް ކުރައްވާނެކަމުގައި ރައީސް ވިދާޅުވި ކަމަށް ރައީސް އޮފީހުން މައުލޫމާތު ދީފައިވެއެވެ.