މާލީ ހާލަތު ރަނގަޅު ކުރަން އަމިއްލަ ހައިސިއްޔަތުން އަބަދުވެސް ނަސޭހަތްދޭ ކަމަށް ކުރީގެ ނައިބު ރައީސް އަހުމަދު އަދީބު ވިދާޅުވެއްޖެއެވެ.
އަދީބު ސޯޝަލްމީޑިއާގައި ކުރެއްވި ޕޯސްޓެއްގައި ވިދާޅުވީ މާލީ ހާލަތު ރަނގަޅު ކުރަން އަމިއްލަ ހައިސިއްޔަތުން ސަރުކާރުގައި ތިބޭ ރައްޓެހިންނަށް އަބަދުވެސް ނަސޭހަތްދެމުންދާ ކަމަށެވެ.
މިދިޔަ އެމްޑީޕީ ސަރުކާރުގައި ތިބި އެކުވެރިންނަށްވެސް އެގޮތަށް ނަސޭހަތް ދީފައިވާނެކަން އަދީބު ފާހަގަ ކުރެއްވިއެވެ.
އަދީބު ވިދާޅުވީ މިކަން ކުރަނީ އެއްވެސް ރަސްމީ ހައިސިއްޔަތަކުން ނޫން ކަމަށާއި އެކަން ކުރަނީ ފަރުދީ ޒިންމާއެއްކަމަށް ދެކިގެން ކަމަށެވެ.
"އެއީ ރަސްމީ ކަމެއްނޫނެވެ. އެއީ ފަރުދީ ޒިންމާއެކެވެ. ދިވެހިރާއްޖެއަކީ އަޅުގަނޑުގެވެސް އުފަންގައުމެވެ." އަދީބު ވިދާޅުވިއެވެ.
ރާއްޖޭގެ މާލީ ހާލަތު ރަނގަޅުކުރަން ނަސޭހަތްދޭކަމަށް އަދީބު ވިދާޅުވިއިރު، މިފަހުން ބީއެމްއެލް އިން ކާޑު ލިމިޓަށް ގެނައި ބަދަލުތަކާ ގުޅިގެން ގިނަބަޔަކު ކަންބޮޑުވުންފާޅުކުރިއެވެ. އަދި ފަހުން ބީއެމްއެލްގެ ނިންމުން ބަދަލުކުރިއިރު މިކަމަކީ "މާލީ ބަޣާވާތެއް"ގެ ގޮތުގައި ސަރުކާރުން ވަނީ ސިފަ ކޮށްފައެވެ. އަދި މިކަން ތަހުގީގު ކުރަމުންދާކަން ފުލުހުން ބުނެފައިވެއެވެ.