ރާއްޖޭގެ ޓޫރިޒަމް ޕްރޮމޯޓް ކުރަން ކުރަމުން އަންމަ މަސައްކަތުގެ ތެރެއިން ޖަރުމަންގައި ރާއްޖެ ތަމްސީލު ކުރާނެ އެޖެންސީއެއް ހޯދަން އެމްއެމްޕީއާރްސީން އިއުލާންކޮށްފި އެވެ.
އެ ކުންފުނިން ބުނީ ޖަރުމަނަށް އެޖެންސީއެއް ހޯދަނީއަހަރު ދުވަހުގެ މުއްދަތަށް ކަމަށާއި މީގެ މައިގަނޑު މަގުސަދަކީ ރާއްޖޭގެ ޓޫރިޒަމް ޖަރުމަންގެ މީހުން އަހުލުވެރިކޮށް، އެ ގައުއުމުން އަންނަ ޓޫރިސްޓުންގެ އަދަދު އިތުރު ކުރަން މަސައްކަތްތައް ކުރުން ކަމަށެވެ.
އެހެންވެ ޝައުގުވެރިވާ ފަރާތްތަކަށް ޕްރޮޕޯސަލް ހުށަހެޅުމުގެ ފުރުސަތު މި މަހުގެ 19 އާ ހަމައަށް ވަނީ ހުޅުވާލައިފަ އެވެ.
މިކަމަށް އެމްއެމްޕީއާރްސީން ވަނީ މަހަކަށް 3،600 ޑޮލަރުގެ ބަޖެޓެއް ކަނޑައަޅައިފައެވެ. އެ ކުންފުނިން ބުނި ގޮތުގައި ޕްރޮޕޯސަލް ހުށަހަޅާ އެޖެންސީތަކަކީ ފާއިތުވި ފަސް އަހަރު ތެރޭގައި އެފަދަ މަސައްކަތެއްގެ ތަޖުރިބާ ލިބިފައިވާ ތަނަކަށް ވާން ޖެހޭނެ އެވެ.
ޖަރުމަންގައި ރާއްޖެ ތަމްސީލު ކުރާނެ އެޖެންސީއެއް ހޯދާ އިރު، އެ ގައުމަކީ މިހާރު ވެސް ރާއްޖެ އެންމެ ގިނަ ޓޫރިސްޓުން 10 ގައުމުގެ ތެރޭގައި ހިމެނޭ ގައުމެކެވެ. އެގޮތުން މިހާރު ލިސްޓްގައި 5 ވަނައިގައި އޮތް ޖަރުމަނުން މި މަހުގެ 1 އާ ހަމައަށް ރާއްޖެ އަށް 98،183 ޓޫރިސްޓުން އައިސްފައިވެ އެވެ.