ގުދަނަކުން ޓީވީއެއް ވަގަށް ނެގި މީހަކު އެއް އަހަރަށް ޖަލަށް ލުމަށް ހުކުމް ކޮށްފިއެވެ.
މި މައްސަލައިގައި، އެހެން މީހެއްގެ މުދަލެއްގެ މައްޗަށް ހުއްދަނޫން ގޮތެއްގައި ބާރުހިންގުމުގެ ކުށުގެ ދައުވާ އުފުލާފައިވަނީ ތ. ތިމަރަފުށި، ކަށިކެޔޮމާގެ ރިޝާމު ރަޝީދުގެ މައްޗަށެވެ.
އޭނާގެ މައްޗަށް މި މައްސަލައިގައި އުފުލި ދައުވާގައި ބުނެފައިވަނީ 2021 މާޗް 4 ވަނަ ދުވަހު ކެނެރީމަގުގައި ހުންނަ އޭޖީއޭ އެންޕޯރިއަމް ގުދަން ފަޅާލައިގެން އެއްޗެހިތަކެއް ނެރެގެންދާ ކަމަށް ފުލުހުންނަށް މައުލޫމާތު ލިބުމުން، ފުލުހުން އެސަރަހައްދަށް ދިޔައިރު މީނާއާއި އިތުރު މީހަކު އެގުދަނުން 55 އިންޗީގެ ޓީވީއެއް އޭގެ ފޮއްޓާއިއެކު ހިފައިގެން ދަނިކޮށް ފެނިފައިވާ ކަމަށެވެ.
މި ދައުވާއަށް ރިޝާމް ރަޝީދު ވަނީ ކޯޓުގައި އިންކާރުކޮށްފައެވެ. އެހެންކަމުން މިމައްސަލަ ސާބިތު ކުރުމަށް ދައުލަތުން ހުށަހެޅި ހެކިން ވަނީ ހާމަކޮށްފައެވެ.
މިމައްސައިގައި ޝަރީއަތަށް ފާހަގަކުރެވުނު ކަންކަމުގެ ގޮތުގައި ބުނެފައިވަނީ، މި ޓީވީއަކީ އެ ގުދަނުގައި ހުއްޓާ އެތަނުން ނެގި އެއްޗެއްކަން ސާބިތުވާ ކަމަށާއި އަދި ދައުވާ ލިބޭ މީހާގެ އަތުން ވަގަށްނެގި ޓީވީ ފެނިފައިވާ ކަމަށެވެ. އަދި އެޓީވީއަކީ މިމީހުންގެ މުދަލެއް ނޫންކަން ސާބިތުވާ ކަމަށްވެސް ފާހަގަ ކޮށްފައިވެއެވެ. ގުދަނުން ޓީވީ ނަގާފައިވަނީ ތަޅު މަތާލައިގެން ކަމަށާއި ދައުވާ ލިބޭ އެއްފަރާތުގެ ޖީބުން ތަޅު ހަލާކުކޮށްލުމަށް ބޭނުންކުރެވިދާނެ އާލާތެއް ފެނިފައިވާ ކަމަށެވެ.
އެހެންކަމުން މީނާގެ މައްޗަށް ކުށް ސާބިތުވާ ކަމަށް ކަނޑައަޅައި 1 އަހަރާއި 2 މަހާއި 12 ދުވަހަށް ޖަލަށްލުމަށް ވަނީ ހުކުމް ކޮށްފައެވެ.