ރާއްޖޭގެ ތިމާވެށި ސާފުކޮށް ބެލެހެއްޓުމަށް ކުރެވޭ މަސައްކަތްތައް ބެލުމަށް ވޯލްޑް ބޭންކުގެ ޓެކްނިކަލް މިޝަނެއް ރާއްޖެ އައިސް މަސައްކަތް ކުރިއަށް ގެންދާ ކަމަށް އެންވަޔަރަމަންޓް މިނިސްޓްރީން ބުނެފި އެވެ.
މި މިޝަންގެ ދަށުން، ވޯލްޑް ބޭންކުގެ ޓީމުން ބަލަމުން އަންނަނީ މޯލްޑިވްސް ކްލީން އެންވަޔަރަމެންޓް ޕްރޮޖެކްޓްގެ ދަށުން ކުރެވެމުން އަންނަ މަސައްކަތްތަކުގެ ޖުމްލަ ކުރިއެރުންތަކެވެ.
އެގޮތުން ޒޯން 4 އާއި 5 ގައި ގާއިމު ކުރަމުން އަންނަ ކުނި މެނޭޖްކުރުމުގެ ނިޒާމުތަކާއި، އެ ނިޒާމުތައް ގާއިމުކުރުމަށް ފޯރުކޮށް ދީފައިވާ ވަސީލަތްތައް މިޝަން އިން ވަޒަން ކުރާނެ އެވެ. މީގެ އިތުރުން، ވޯލްޑް ބޭންކުގެ ޓީމުން ޕްރޮޖެކްޓް މެނޭޖްމަންޓް ޔުނިޓާ އެކު ލ. އަތޮޅުގެ ފޮނަދު އާއި ގަން އަދި މާމެންދު ށް ޒިޔާރަތްކޮށް، އެ ރަށްރަށުގައި ކުރިއަށްދާ ކުނި މެނޭޖްކުރުމުގެ މަރުކަޒުތަކުގެ މަސައްކަތް ބަލައި އަންނަނީ ދިރާސާކުރަމުންނެވެ.
މި ދަތުރުގައި، ވޯލްޑް ބޭންކުގެ ޓީމުން ރަށު ކައުންސިލްތަކުގެ މެންބަރުންނާއި އެހެނިހެން ފަރާތްތަކާ ބައްދަލުކޮށް، މި ނިޒާމުތައް ހިންގުމަށް ރޭވިފައިވާ ގޮތްތަކާ ބެހޭގޮތުން މަޝްވަރާކުރުމަށް ވެސް ހަމަޖެހިފައިވެއެވެ.
މި މަހުގެ 1 ގައި ފެށި މި ދަތުރު ކުރިއަށް ދާނީ މިއަދާ ހަމައަށެވެ.
ވޯލްޑް ބޭންކުގެ ޓީމާ އެކީ ދަތުރުގައި ބައިވެރިވަނީ މޯލްޑިވްސް ކްލީން އެންވަޔަރަމެންޓް ޕްރޮޖެކްޓްގެ ޕްރޮޖެކްޓް މެނޭޖަރާއި ޕްރޮޖެކްޓް ކޯޑިނޭޓަރުންނާއި ސޭފްގާޑް ސްޕެޝަލިސްޓްބގެ އިތުރުން ކޮމިއުނިކޭޝަން ސްޕެޝަލިސްޓެވެ.
މިއީ "މަގޭ ސާފު ރާއްޖެ" ގެ ޝިޢާރުގެ ދަށުން ކުރިއަށް ގެންދެވޭ މަސައްކަތްތަކެކެވެ.