އަނިޔާއިން އެއްކިބާވެފައިވާ މާޙައުލެއްގައި ކުދިން ހެދިބޮޑުވުމުގެ ފުރުސަތު މި ސަރުކާރުން ކަށަވަރުކޮށް ދޭން މަސައްކަތް ކުރާނެ ކަމަށް ފަސްޓްލޭޑީ ސާޖިދާ މުހައްމަދު ވިދާޅުވެއްޖެ އެވެ.
"ކުޑަކުދިންނަށް ކުރާ އަނިޔާ ހުއްޓުވުމާއި، ރައްދުދިނުމާ ބެހޭ ނޭޝަނަލް އެކްޝަން ޕްލޭން 2024-2028" އިފްތިތާހުކުރަށް މިއަދު ބޭއްވި ރރަސްމިއްޔާތުގައި އެކަމަނާ ވިދާޅުވީ ކުޑަކުދިންނަށް ރައްކާތެރި މާހައުލެއް ގާއިމުކުރުމަކީ ސަރުކާރުގެ ޒިންމާއެއް ކަމަށެވެ. އަދި ޒިންމާގެ ދަށުން ކުޑަކުދިންގެ ހައްޤުތަކާއި ރައްކާތެރިކަމާއި ގުޅޭ ޤައުމީ ޕްލޭން އިފްތިތާހުވެގެން ދިއުމާ އެކީ ކަމާގުޅޭ މުއައްސަސާތައް އެ މަގަށް މަސައްކަތްތައް ބައްޓަން ކުރަން ފަސޭހަވާނެ ކަމަށް ސާޖިދާ ވިދާޅުވި އެވެ.
އެކަމަނާ ވިދާޅުވީ މިއަދު އިފުތިތާހު ކުރި ޕްލޭނަކީ ހަމައެކަނި ޕޮލިސީއެއް ނޫން ކަމަށެވެ. އަދި އެއީ ކުޑަކުދިންނަށް ކުރާ އަނިޔާހުއްޓުވައި، ހިމާޔަތްކޮށް، އެކަމަށް އިޖާބަ ދޭނެ ގޮތްތައް ބަޔާންކުރާ، ވަރަށް ފުރިހަމަ ސާފު މަގުޗާޓެއް ކަމަށް ވިދާޅުވި އެވެ.
"އަޅުގަނޑުމެންގެ ތަޞައްވުރު ވަރަށް ސާފު، ކުޑަކުއްޖަކު އަނިޔާއިން އެއްކިބާވެފައިވާ މާޙައުލެއްގައި ހެދިބޮޑުވުމުގެ ފުރުސަތު ފަހިކޮށް، ޒިންމާދާރު ހަރުދަނާ ފަރުދަކަށް ހަދަން ޖެހޭނެ،" ސާޖިދާ ވިދާޅުވި އެވެ. "މި ތަޞައްވުރު ގެނައުމަށްޓަކައި ބޭނުންވަނީ އެއްބައިވަންތަ މަސައްކަތެއް. އަދި މިކަމަށް ހޭލުންތެރިކަން އިތުރުކުރަން ޖެހޭ."
އެކަމަނާ ވިދާޅުވީ މިއީ މި ގައުމުގެ ކޮންމެ ކުއްޖަކީ ވެސް، ލިބޭ ގެއްލުމުން ސަލާމަތްވުމުގެ އިތުރުން، ރައްކާތެރި މާޙައުލެއްގައި ކުރިއެރުމުގެ ބާރު ލިބިގެންވާ ކުއްޖަކަށް ހެދުމަށް ޓަކައި ކޮންމެހެން ކުރަން ޖެހޭ ދަތުރެއްގެ ފެށުން ކަމަށެވެ.
"އެމީހުން ހިމާޔަތް ކުރުމަކީ އަޅުގަނޑުމެންގެ ވާޖިބެއް. އަދި. ކުޑަކުދިންނަށް ކުރާ އަނިޔާ އާއި ގޯނާގެ މައްސަލަތަކުގައި ވަގުތުން ފިޔަވަޅު އަޅަން ޖެހޭނެ." ސާޖިދާ ވިދާޅުވި އެވެ.