ފޮރިން އިންވެސްޓްމަންޓްގެ ޤާނޫނު ތަސްދީގު ކޮށްފިއެވެ.
ރައީސް ޑރ. މުހައްމަދު މުއިއްޒު މި ގާނޫނު މިއަދު ތަސްދީގު ކުރެއްވިއިރު މި ޤާނޫނު ގެޒެޓްގައި ވަނީ އާންމުކޮށްފައެވެ.
މި ޤާނޫނު މަޖިލީހުން ފާސްކޮށްފައިވަނީ އޮގަސްޓް 22 ވަނަ ދުވަހުއެވެ. މަޖިލީހުން މި ބިލް ފާސް ކުރަން ފެންނަކަމަށް 77 މެންބަރުން ވޯޓު ދެއްވިއިރު ނުފެންނަ ކަމަށް އެއްވެސް މެންބަރެއް ވޯޓު ދެއްވާފައެއް ނުވެއެވެ.
މި ޤާނޫނަކީ ދިވެހިރާއްޖޭގައި ބޭރުގެ ފަރާތްތަކަށް އިންވެސްޓްކުރެވޭނެ ދާއިރާތައް ކަނޑައެޅުމާގުޅޭ އުސޫލުތަކާއި، އެފަދަ ފަރާތްތަކަށް ދިވެހިރާއްޖޭ ގައި އިންވެސްޓްކުރުމުގެ ހުއްދަ ދޫކުރުމާގުޅޭ އުސޫލުތަކާއި، އެފަދަ އިންވެސްޓަރުންނަށް ލިބިދެވޭނެ ޙިމާޔަތާއި ރައްކާތެރިކަމާގުޅޭ އުސޫލުތަކާއި، އެފަދަ އިންވެސްޓްމަންޓްތައް ދައުލަތަށް ނެގޭނެ ހާއްސަ ހާލަތްތަކާއި އެފަދައިން ނެގޭ އިންވެސްޓްމަންޓްތަކަށް ބަދަލުދެވޭނެ އުސޫލުތަކާއި، އެނޫންވެސް ކަމާގުޅޭ އުސޫލުތައް ބަޔާންކުރުމުގެ ޤާނޫނެވެ.
މި އިސްލާހަށް އަމަލުކުރަން ފެށޭނީ ގެޒެޓް ކުރާ ތާރީހުން ފެށިގެން 3 މަސްދުވަސް ހަމަވާ ތާރީހުން ފެށިގެންނެވެ.