ބޭރުގެ ފަރާތްތަކަށް ރާއްޖޭގެ ސެކިއުރިޓީޒްގައި އިންވެސްޓްކުރެވޭ ގޮތަށް ދިވެހިރާއްޖޭގެ މާލީ ސެކިއުރިޓީޒްއާބެހޭ ޤާނޫނަށް އަދި ވިޔަފާރި ރަޖިސްޓަރީކުރުމުގެ ޤާނޫނަށް ގެނައި އިސްލާހުތައް ތަސްދީގުކޮށްފިއެވެ.
ރައީސް ޑރ. މުހައްމަދު މުއިއްޒު މި ދެ ޤާނޫނަށް ގެނެސްފައިވާ އިސްލާހުތައް ތަސްދީގު ކުރައްވާފައިވަނީ މިއަދުއެވެ.
މި ދެ އިސްލާހު މަޖިލީހުން ފާސްކޮށްފައިވަނީ އޮގަސްޓް 22 ވަނަ ދުވަހުއެވެ.
ވިޔަފާރި ރަޖިސްޓަރީކުރުމުގެ ޤާނޫނަށް ގެނައި އިސްލާހުގައި ބުނެފައިވަނީ، ބޭރުގެ އެއްވެސް ފަރާތަކަށް ދިވެހިރާއްޖޭގައި ވިޔަފާރިއެއް ހިންގޭނީ، ދިވެހިރާއްޖޭގެ ކުންފުންޏާބެހޭ ޤާނޫނުގެ ދަށުން ދިވެހިރާއްޖޭގައި ކުންފުންޏެއް ރަޖިސްޓްރީ ކޮށްގެން ކަމަށާއި އަދި ފޮރިން އިންވެސްޓްމަންޓްގެ ޤާނޫނުގައިވާ ގޮތުގެމަތިން ދިވެހިރާއްޖޭގައި އިންވެސްޓްކުރުމުގެ ހުއްދަ ހޯދައިގެން ކަމަށެވެ. މީގެއިތުރުން މި އިސްލާހުގައި ބުނެފައިވަނީ ދިވެހިރާއްޖޭގެ މާލީ ސެކިއުރިޓީޒްއާބެހޭ ޤާނޫނުގައިވާ ގޮތުގެ މަތިން އަދި އެ ޤާނޫނުން ހުއްދަކުރާ ބާވަތެއްގެ ސެކިއުރިޓީޒްގައި ބޭރުގެ ފަރާތްތަކުން އިންވެސްޓް ކުރުމަށް ހުރަސް ނާޅާ ކަމަށެވެ.
ދިވެހިރާއްޖޭގެ މާލީ ސެކިއުރިޓީޒްއާބެހޭ ޤާނޫނަށް ގެނެސްފައިވާ އިސްލާހުގައި ބުނެފައިވަނީ، ބޭރުގެ ފަރާތްތަކަށް ދިވެހިރާއްޖޭގެ ސެކިއުރިޓީޒްގައި އިންވެސްޓްކުރެވިދާނެ ކަމަށެވެ. އަދި ބޭރުގެ ފަރާތްތަކަށް އިންވެސްޓް ކުރެވޭނީ މިޤާނޫނުގެ ދަށުން ހަދާ ގަވައިދުގެ ދަށުން ހުއްދަ ކުރެވޭ ބާވަތުގެ ސެކިއުރިޓީޒްގައި އެގަވައިދު ކަނޑައަޅާ ގޮތުގެ މަތިން ކަމަށް ބަޔާންކޮށްފައިވެއެވެ. މި އިސްލާހަށް އަމަލުކުރަން ފެށޭނީ ގެޒެޓް ކުރާ ތާރީހުން ފެށިގެން 3 މަސްދުވަސް ހަމަވާ ތާރީހުން ފެށިގެންނެވެ.