ބަންގްލަދޭޝްގެ ކުރީގެ ބޮޑުވަޒީރު ޝައިހް ހަސީނާއާ ދެކޮޅަށް ޔޫއޭއީގައި އުޅޭ ބަންގްލަދޭޝްގެ ބަޔަކު ކުރި މުޒާހަރާއާ ގުޅިގެން ޖަލަށްލާފައިވާ 57 މީހަކަށް މައާފު ދިނުމަށް ޔޫއޭއީގެ ރައީސް ޝެއިހް މުހަައްމަދު ބިން ޒައިދް އަލް ނަހްޔާން މައާފު ދެއްވައިފި އެވެ.
ޔޫއޭއީގެ އެކި ހިސާބުތަކުގެ މަގުތަކުގައި ކުރި މުޒާހަރާތަކާ ގުޅިގެން ހައްޔަރުކުރި މީހުންގެ ތެރެއިން ތިން މީހަކު އުމުރަށް ޖަލަށްލި އިރު، 53 މީހަކަށް އިއްވީ 10 އަހަރުގެ ޖަލު ހުކުމެކެވެ. އަދި އެކެއްގެ މައްޗަށް އިއްވީ 11 އަހަރުގެ ޖަލު ހުކުމެކެވެ.
ޔޫއޭއީގެ ދައުލަތުގެ މީޑިއާ އިން ބުނީ މުޒާހަރާއާ ގުޅިގެން ޖަލަށްލާފައިވާ ބަންގްލަދޭޝްގެ 57 މީހަކަށް އިއްވާފައިވާ ޖަލު ހުކުމް ޔޫއޭއީގެ ރައީސް ބާތިލުކޮށްފައިވާ ކަމަށެވެ. އަދި އެމީހުން ޔޫއޭއީން ޑީޕޯޓު ކުރުމަށް ވެސް ނިންމާފައިވާ ކަމަށް ބުނެފައިވެ އެވެ.
ޔޫއޭއީގައި މުޒާހަރާ ކުރުމަކީ މަނާކަމެއް ކަމަށްވާއިރު، ޔޫއޭއީގެ އާބާދީގެ 90 ޕަސެންޓަކީ އެކި ގައުމުތަކަށް ނިސްބަތްވާ މީހުންނެވެ. އަދި އެ ގައުމުގައި ތިން ވަނަ އަށް އެންމެ ގިނައީ ބަންގްދަލޭޝް އަށް ނިސްބަތްވާ މީހުންނެވެ.
ސަރުކާރުގެ ވަޒީފާތަކަށް މީހުން ނެގުމުގައި ގެންގުޅޭ ކޯޓާގެ އުސޫލުގެ މައްސަލާގައި ބަންގްލަދޭޝްގައި ކުރި މުޒާހަރާތަކާ ގުޅިގެން ހަސީނާ ވަނީ މަގާމުން އިސްތިއުފާ ދެއްވުމަށްފަހު އަވަށްޓެރި އިންޑިއާ އަށް ވަޑައިގެންފަ އެވެ.