ރައީސް ޑރ. މުހައްމަދު މުއިއްޒު ގައުމީ ދުވަހުގެ މުނާސަބަތުގައި މިއަދު ދެއްވީ ތާރީހީ ހިތާބެއް ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.
ޝަހީމް "އެކްސް"ގައި ކުރެއްވި ޕޯސްޓެއްގައި ވިދާޅުވީ ރައީސް މުއިއްޒު މިއަދު ދެއްވި ޤައުމީ ތަޤުރީރަކީ ތާރީޚީ ތަޤުރީރެއް ކަމަށާއި އެ ތަގުރީރުގައި އިސްލާމްދީނާއި ރިވެތި އަޚުލާޤާއި ޤައުމީ ބަހާތަށް ދިރުވަން ގޮވާލެއްވި ކަމަށެވެ.
"މިކަންކަމަށް ރާއްޖެ ނުހަނު ބޭނުން ޖެހިފައިވާ ދަނޑިވަޅެއްގައި ރައީސްގެ ފަރާތްޕުޅުން ރައްޔިތުންނަށް ދެއްވި ހިއްވަރަށް ޝުކުރު ދަންނަވަން،" ޝަހީމް ވިދާޅުވި އެވެ.
ގައުމީ ދުވަހުގެ މުނާސަބަތުގައި ރައީސް ދެއްވި ހިތާބުގައި ވިދާޅުވީ މި ޤައުމުގައި އިސްލާމީ އަޚްލާޤާއެކު އިސްލާމީ ދިވެހި އާދަކާދަވެސް ދިރުވައި އާލާކުރަން ޖެހޭ ކަމަށާއި އަދި މި ކަމުގައިވެސް ދިވެހީންގެ ވަރަށް ކައިރި ތާރީޚު ދައްކަނީ އާދަޔާ ޚިލާފު ރީތި ނަމޫނާއެއް ކަމަށެވެ. އަދި ދިވެހީންގެ އަމިއްލަކަން ނުވަތަ ދިވެހި އައިޑެންޓިޓީ އިއާދަކުރުމުގައި ކުރީގެ ރިވެތި ސިފަތައް ބޭނުންފުޅުވާ ކަމަށް ރައީސް ވިދާޅުވި އެވެ.
"ފަތިހު ހޭލާ ދިވެހި ޤައުމެއް ބޭނުން. ހެނދުނާއި ދެނަމާދު ދޭތެރޭ ކީރިތި ޤުރުއާން ކިޔެވުމުގައި ކުޑަ ކުދީން ޝައުޤުވެރިކަމާއެކު އުޅޭ ދިވެހި ޤައުމެއް އަޅުގަނޑު ދެކެން ބޭނުން. ފަރުޟު ނަމާދުގެ ޖަމާޢަތްތައް ބައިބޯކޮށް ފެންނަން ބޭނުން. އެކަމުގެ މާތްކަމާއި އެކަމުގައި ހުރި ދަރުމައިގެ ގިނަކަން އަޅުގަނޑުމެން ކުރެ ކޮންމެ ދިވެއްސަކަށް އިޙްސާސްވާން ބޭނުން. ހަމައެހެންމެ މިސްކިތްތަކަށް އިހުގައި ކުރި އިޙްތިރާމު އަލުން ގެންނަން ބޭނުން." ރައީސް ވިދާޅުވި އެވެ.
މި ސިފަތައް އާލާކުރުމަށް ކޮންމެ މީހަކުވެސް އަމިއްލަ ނަފުސާ ހަމައިން ފެށިގެން ޢާއިލާއަށާއި ގާތް މީހުންގެ ކިބައިގައި މި ސިފަތައް އަށަގެންނެވުމަށް ބާރުއަޅަންޖެހޭ ކަމަށް ރައީސް ވިދާޅުވި އެވެ.