ގުރައިދޫ މަގުތަކުގައި ގަސް އިންދުމުގެ މުބާރާތެއް

ކ. ގުރައިދޫގެ މަގުތަކުގައި ގަސް އިންދުމުގެ މުބާރާތެއް ބާއްވަން އެ ރަށު ކައުންސިލުން ނިންމައިފި އެވެ.

ކައުންސިލުން ބުނީ މި މަހުގެ 1 ވަނަ ދުވަހުން ފެށިގެން އެ މުބާރާތް ކުރިއަށް ދާނީ އެ ރަށުގެ 14 ސަރަހައްދަކަށް ބަހާލައިގެން އަހަރު ދުވަހުގެ މުއްދަތަކަށް ކަމަށެވެ. އެގޮތުން މުބާރާތުގައި ކަނޑައެޅިފައިވާ މިންގަނޑުތަކަށް ބެލުމަށް ފަހު ކަމުގެ ތަޖުރިބާ ހުރި ރަށުންބޭރު ފަރާތެއް ނުވަތަ ފަރާތްތަކެއްގެ އެހީގައި ގަދަ ތިނެއް ހޮވާނެ ކަމަށް ކައުންސިލުން ބުންޏެވެ.

އެއް ވަނަ ސަރަހައްދުގެ އިނާމަކަށް 30،000ރ، ދެވަނަ ސަރަހައްދުގެ އިނާމަކަށް 20،000ރ. އަދި ތިން ވަނަ ސަރަހައްދުގެ އިނާމަލަށް 10،000ރ. ލިބޭނެ އެވެ.

ކައުންސިލުން ބުނީ "ގުރައިދޫގެ މަގުތަކުގައި ގަސްއިންދާ ޒީނަތްތެރިކުރުމުގެ މުބާރާތް" އިއުލާނުކުރާ ތާރީހުން ފެށިގެން 15 ދުވަހުގެ ތެރޭގައި މުބާރާތުގައި ބައިވެރިވުމަށް ކޮންމެ ސަރަހައްދަކުންވެސް ރަޖިސްޓްރީވާން ޖެހޭނެ ކަމަށެވެ. އަދި ރަޖިސްޓްރީވާއިރު ސަރަހައްދަށް ނަމެއް ކަނޑައަޅައި ސަރަހައްދުގެ ލީޑަރަކު ކަނޑައަޅަން ޖެހެ އެވެ.

ކޮންމެ ސަރަހައްދަކު ންވެސް ކަނޑައަޅާ ލީޑަރަކީ މުބާރާތް ނިމެންދެން މުބާރާތުގެ ހުރިހާ ކަމަކާ ގުޅޭ ގޮތުން ކައުންސިލާ މުއާމަލާތުކުރާނެ ފަރާތަށް ވާނެތީ ކޮންމެ ސަރަހައްދަކުންވެސް ކަނޑައަޅާ ލީޑަރަކީ ފަސޭހަކަމާ އެކީ މުއާމަލާތުކުރެވޭނެ ފަރާތަކަށް ވާން ޖެހޭނެ އެވެ.