އިންޑިއާގެ މަޝްހޫރު ފިލްމީ ތަރި މިތުން ޗަކްބަރަތީގެ ހަގު ފިރިހެން ދަރިފުޅު ނަމާޝީ ޗަކްރަބަތީ ފިލްމެއް ޑައިރެކްޓްކުރަން ތައްޔާރުވެއްޖެ އެވެ.
މި މަހުގެ ފަހުކޮޅު އެމެރިކާގެ ލޮސް އެންޖެލިސްގައި ޝޫޓިން ފަށަން ހަމަޖެހިފައިވާ މި ފިލްމަކީ ނަމާޝީ ޑައިރެކްޓްކޮށް ކުޅެން ހަމަޖެހިފައިވާ ފިލްމެކެވެ. ނަން އަދި ހާމަނުކުރާ މި ފިލްމު އިއުލާންކުރަން މިއަދު ވަނީ ފަސްޓްލުކް ޕޯސްޓެއް ވެސް އާންމުކޮށްފަ އެވެ. އޭގައި ފިލްމުގެ ޓެގް ލައިނެއްގެ ގޮތުގައި ހިމަނާފައި ވަނީ "ހޯންޓިން ލަވް ސްޓޯރީ" އެވެ.
މިއީ ނަމާޝީ 27، ގެ އަމިއްލަ ފިލްމު ޕްރޮޑަކްޝަން ހައުސް ނަމާޝީ ޗަކްރަބަތީ ޕިކްޗާ އާއި އޭނަގެ އާއިލީ ފިލްމު ކުންފުނި އެމްވައިއާރްއެންޑީ މޫވީސް ގުޅިގެން ހަދަން ހަމަޖެހިފައިވާ ފިލްމެކެވެ. މި ފިލްމު އަންނަ އަހަރުގެ ފެބްރުއަރީ 14 ގައި ރިލީޒްކުރާނެ އެވެ.
ނަމާޝީގެ ފުރަތަމަ ފިލްމަކީ މިދިޔަ އަހަރުގެ އެޕްރީލްގައި ރިލީޒްކުރި ރޮމޭންޓިކް ކޮމެޑީ "ބޭޑް ބޯއި" އެވެ. ބެލުންތެރިންގެ މާ ބޮޑު ސަމާލު ކަމެއް ނުލިބޭ އެ ފިލްމު ޑައިރެކްޓްކުރީ ކުޅަދާނަ ޑައިރެކްޓަރު ރާޖްކުމާރު ސަންތޯޝީ އެވެ. އޭނަ އަކީ "ގާޔަލް" އާއި "ގަތަކު"، "ދާމިނީ" އަދި "އަންދާޒް އަޕްނާ އަޕްނާ" ފަދަ އައިކޮނިކް ފިލްމުތައް ގެނެސްދިން ޑައިރެކްޓަރެވެ.
މިތުންގެ ތިން ކުދިންގެ ތެރެއިން ދޮށީ ދަރިފުޅު މަހާއަކްޝޭ (މިމޯ) ޗަކްރަބަތީ، 40، އަކީ ވެސް އެކްޓަރެކެވެ. ސްޓާ ޕްލަސްގެ ސިލްސިލާ "އަނޫޕަމާ" ގައި ކާވިއާގެ ރޯލު ކުޅޭ މަދަލްސާ ޝަރުމާއާ ކައިވެނިކޮށްގެން އުޅޭ މިމޯ އެންމެ ފަހުން ފެނިފައި ވަނީ މިދިޔަ އަހަރުގެ "ޖޯގިރާ ސަރަ ރާ ރާ" އިންނެވެ.
ނަމާޝީ ޑައިރެކްޓްކުރާ ފިލްމުގައި ބޭބެ މިމޯގެ އިތުރުން ދައްތަ ޑިޝާނީ ޗަކްރަބަތީ ވެސް ހިމެނޭނެ އެވެ.