ސިދާތު މަލްއުތުރާ އާއި ޖާންވީ ކަޕޫރް ލޯބީގެ ފިލްމަކަށް ތައްތާރުވަމުން އަންނަ ކަމަށް ރިޕޯޓްތައް ބުނެފި އެވެ.
ފިލްމީ ޚަބަރުތައް ގެނެސްދޭ މީޑިއާތަކުން ބުނީ މިއީ މިހާރު ފުލުފުލުގައި ކާމިޔާބު ފިލްމުތަކެއް ގެނެސްދެމުން ޕްރޮޑިއުސަރު ދިނޭޝް ވިޖަންގެ މެޑޮކް ފިލްމްސް އިން ހަދާ ފިލްމެއް ކަމަށާއި ނަން އަދި ހާމަނުކުރާ ފިލްމުގެ ޑައިރެކްޓަރަކީ ތުޝާރު ޖަލޯޓާ ކަމަށެވެ. އޭނަ އަކީ އަބީޝެކް ބައްޗަންގެ 2022 ގެ "ދާސްވީ" ގެނެސްދިން ޑައިރެކްޓަރެވެ.
މެޑޮކްސް އަށް ސިދާތާއި ޖާންވީ ކުޅޭ ފިލްމު ވާނީ ދެ ތަރިން އެކީގައި ކުޅޭ ފުރަތަމަ ފިލްމަށެވެ. އަދި މިއީ ސިދާތު މެޑޮކް އަށް ކުޅޭ ފުރަތަމަ ފިލްމަށް ވެސް މެ އެވެ.
އެ ސްޓޫޑިއޯގެ ދެ ފިލްމެއްގައި ޖާންވީ ކުރިން މަސައްކަތްކޮށްފައިވެ އެވެ. އެއި 2021 ގެ "ރޫހީ" އާއި އޭނަގެ ހާއްސަ ފެނިލުމެއް ހިމެނޭ އަދި މި އަހަރުގެ ފެބްްރުއަރީގައި ރިލީޒްކުރި ޝާހިދު ކަޕޫރާއި ކްރިތީ ސެނަންގެ "ތޭރީ ބާތޯ މޭ އޭސާ އުލްޖާ ޖިއާ" އެވެ.
ދާދި ފަހުން ރިލީޒްކުރި "އުލާޖް" އާއި "މިސްޓަ އެންޑް މިސިޒް މާހީ" އަށް ފަހު، ޖާންވީގެ އިތުރު ފިލްމެއް ސިނަމާ އަށް މިހާރު އޮތީ އައުމުގެ މަގުމަތީގަ އެވެ. އެއީ މަޝްހޫރު ތެލެގޫ އެކްޓަރު އެންޓީއާރް ޖޫނިއާއާ އެކީ ކުޅެފައިވާ "ދެވާރާ: ޕާޓް 1" އެވެ. އެ ފިލްމު ރިލީޒްކުރާނީ މި މަހުގެ 27 ގަ އެވެ.
ބަތަލާ ކިއާރާ އަދުވާނީގެ ފިރިމީހާ ސިދާތުގެ އެންމެ ފަހުގެ ފިލްމަކީ މާޗްގައި ރިލީޒްކޮށް ފްލޮޕްވި "ޔޯދާ" އެވެ.