އާމްދަނީގެ ޓެކްހުގެ ގޮތުގައި މި އަހަރު އެންމެ ބޮޑު އަދަދެއް ދެއްކި އިންޑިއާގެ ސެލެބްރިޓީ އަކީ މަޝްހޫރު ފިލްމީ ތަރި ޝާހްރުކް ކާން ކަމަށް ރިޕޯޓްތައް ބުނެފި އެވެ.
ސެލެބްރިޓީންގެ އިންކަމް ޓެކްހާ ގުޅޭ ގޮތުން ފޯޗޫން އިންޑިއާ އިން އާންމުކޮށްފައިވާ ރިޕޯޓެއްގައިވާ ގޮތުގައި ޓެކްހުގެ ގޮތުގައި ޝާހްރުކް 92 ކްރޯޑް ރުޕީސް (11 މިލިއަން ޑޮލަރު) ދައްކާފައިވެ އެވެ. ބޮލީވުޑްގެ އެންމެ އަގުބޮޑު ތަރިންގެ ތެރޭގައި ހިމެނޭ ޝާހްރުކަކީ މިދިޔަ އަހަރު އެކަނި ވެސް ވަރަށް ބޮޑު އާމްދަނީއެއް ލިބުނު ތަރިއެކެވެ.
އުމުރުން 58 އަހަރުގެ އެކްޓަރުގެ ވަރަށް ކާމިޔާބު ތިން ފިލްމެއް މިދިޔަ އަހަރު ރިލީޒްކުރި އެވެ. އެއީ "ޕަތާން" އާއި "ޖަވާން" ގެ އިތުރުން "ޑަންކީ" އެވެ.
ދެވަނަ އަށް މި އަހަރު އެންމެ ގިނަ ޓެކްސް ދެއްކި ސެލެބްރިޓީ އަކީ މަޝްހޫރު ތަމަޅަ އެކްޓަރު ވިޖޭ އެވެ. މިއަދު ސިނަމާތަކަށް ގެނައި ގްރޭޓެސްޓް އޮފް އޯލް ޓައިމް (ގޯޓް) ގެ އެކްޓަރު ޓެކްހުގެ ގޮތުގައި 80 ކްރޯޑް ރުޕީސް (10 މިލިއަން ޑޮލަރު) ދައްކާފައިވެ އެވެ.
ލިސްޓްގެ ތިން ވަނަގައި އޮތީ ބޮލީވުޑްގެ ތަރި ސަލްމާން ޚާނެވެ. އޭނަ ޓެކްހަށް 75 ކްރޯޑް ރުޕީސް (9 މިލިއަން ޑޮލަރު) ދައްކާފައިވެ އެވެ.
ލިސްޓްގައި ދެން ހިމެނޭ ސެލެބްރިޓީންނަށް ބަލާ އިރު އަމީތާބް ބައްޗަން (71 ކްރޯޑް ރުޕީީސް)، ކްރިކެޓް ތަރި އަދި ބޮލީވުޑްގެ ބަތަލާ އަނުޝްކާ ޝަރުމާގެ ފިރިމީހާ ވިރާޓް ކޯލީ (66 ކްރޯޑް ރުޕީސް)، އަޖޭ ދޭވްގަން (42 ކްރޯޑް ރުޕީސް)، ކްރިކެޓް ތަރި އެމްއެސް ދޯނީ (38 ކްރޯޑް ރުޕީސް)، ރަންބީރް ކަޕޫރް (36 ކްރޯޑް ރުޕީސް) އަދި ކްރިކެޓް ލެޖެންޑް ސަޗިން ޓެންޑުލްކަރާއި ރިތިކް ރޯޝަން (28 ކްރޯޑް ރުޕީސް) ޓެކްހަށް ދައްކާފައިވެ އެވެ.
އެންމެ ބޮޑު އަދަދަކު ންމި އަހަރު ޓެކްސް ދެއްކި ސެލެބްރިޓީންގެ ތެރޭގައި ދެ ބަތަލާއަކު ވެސް ހިމެނެ އެވެ. އެގޮތުން ކަރީނާ ކަޕޫރް 20 ކްރޯޑް ރުޕީސް ދެއްކި އިރު، ކިއާރާ އަދުވާނީ 12 ކްރޯޑް ރުޕީސް ދައްކާފައިވެ އެވެ.