ފުވައްމުލަކުން ޓޫރިޒަމް އެވޯޑެއް ދޭން ނިންމައިފި އެވެ.
ފުވައްމުލަކު ސިޓީ ކައުންސިލުން ބުނީ އެ ސިޓީ އަށް ޓޫރިޒަމްގެ ވިޔަފާރި ތައާރަފުވިތާ މިހާރު 10 އަހަރުވެފައިވާތީ އެ ދާއިރާގައި ހަރަކާތްތެރިވާ އެކި ފަރާތްތަކުގެ އަގުވަޒަން ކުރުމުގެ ގޮތުން ކައުންސިލުން އިންތިޒާމުކޮށްގެން ދިނުމަށް ހަމަޖެހިފައިވާ "ފުވައްމުލައް ޓޫރިޒަމް އެވޯޑްސް 2024" އަށް ކުރިމަތިލާން ވެސް މިހާރު ހުޅުވާލާފައިވާ ކަމަށެވެ.
އެގޮތުން އެވޯޑަށް ނަން ހުށަހެޅުމުގެ ފުރުސަތު މި މަހުގެ 19 ވަނަ ދުވަހުގެ މެންދުރު 12:00 އާ ހަމައަށް ވަނީ ހުޅުވާލައިފަ އެވެ.
ފުވައްމުލަކު ކައުންސިލުން ބުނީ އެވޯޑް ދޭން ހަމަޖެހިފައި ވަނީ 10 ކެޓަގަރީއަކަށް ކަމަށެވެ.
* އެންމެ ފުރަތަމަ ރަޖިސްޓްރީކުރި ގެސްޓްހައުސް
* އެންމެ ފުރަތަމަ ރަޖިސްޓްރީކުރި ޑައިވް ސެންޓަރު
* ޓޫރިޒަމް ދާއިރާގެ އާންމު ހިދުމަތުގެ އެވޯޑް
* އެންމެ މަގުބޫލު ގެސްޓްހައުސް
* އެންމެ މަގުބޫލު ޑައިވް ސެންޓަރު
* އިންޓަނޭޝަނަލް ފެއާއެއްގައި އެންމެ ފުރަތަމަ ފުވައްމުލައް ޕްރޮމޯޓްކުރި ފަރާތް
* ލީޑިން ގެސްޓްހައުސް
* ލީޑިން ޑައިވް ސެންޓަރު
* ފުވައްމުލަކުގެ އަންޑަވޯޓާ ފޮޓޯގްރަފީ
* ފުވައްމުލަކު ވެށީގެ ފޮޓޯގްރަފީ
ކައުންސިލުން ބުނީ މި ކެޓަގަރީތަކުން އެވޯޑް ދޭނީ އެކަމަށް ހާއްސަކުރާ ކޮމިޓީއަކުން ކުރިމަތިލާ މީހުންގެ އިވެލުއޭޓް ކުރުމަށް ފަހު ކަމަށެވެ. އެ ކޮމިޓީގައި އަމިއްލަ ފަރާތްތަކާއި ޓޫރިޒަމް ދާއިރާގެ ސްޓޭކް ހޯލްޓަރުން ހިމެނޭނެ އެވެ. އެވޯޑް ދޭނީ އާންމުންގެ ވޯޓަކަށް ވެސް ހުޅުވައިލުމަށް ފަހު، އެ ވޯޓަށް ވެސް ރިއާޔަތްކޮށެވެ.
"ފުވައްމުލައް ޓޫރިޒަމް އެވޯޑްސް 2024" ބާއްވާނެ ތާރީހެއް އަދި އިއުލާނެއް ނުކުރެ އެވެ.