ބޮލީވުޑްގެ ތަރި ޝާހްރުކް ޚާންގެ ދޮށީ ފިރިހެން ދަރިފުޅު، އަރިއަން ޚާން އެކްޓަރެއްގެ ގޮތުގައި ބޮލީވުޑަށް ނެރުމުގެ ޝައުގުވެރިކަން ވަރަށް ގިނަ ޕްރޮޑިއުސަރުން ފާޅުކޮށް، އެކަން ޝާހްރުކަށް ހުށަހަޅަމުން އަންނަ ކަމަށް ރިޕޯޯޓްތައް ބުނެފި އެވެ.
ޕިންކްވިލާ އިން ބުނީ އެފަދަ ހުށަހެޅުންތަކެއް ހުށަހެޅި ފަރާތްތަކުގެ ތެރޭގައި ޝާހްރުކާ އެންމެ ގާތް މީހުންގެ ތެރޭގައި ހިމެނޭ ޑައިރެކްޓަރު/ޕްރޮޑިއުސަރު ކަރަން ޖޯހަރާއި ޑައިރެކްޓަރު/ޕްރޮޑިއުސަރު އަދިތިޔާ ޗޯޕްޅާ އާއި ޑައިރެކްޓަރު ފަރާ ޚާންގެ އިތުރުން ޑައިރެކްޓަރު ރާކޭޝް އޯމްޕްރަކާޝް މެހެރާ ހިމެނޭ ކަމަށެވެ.
މީގެ އިތުރުން ދެކުނުގެ ބައެއް ޕްރޮޑިއުސަރުންނާއި ޑައިރެކްޓަރުން ވެސް އަރިއަން އެކްޓަރެއްގެ ގޮތުގައި ލޯންޗްކުރަން ޝައުގުވެރިވާ ކަމަށް މީޑިއާތަކުން ބުނެ އެވެ.
ފާހަގަކޮށްލެވޭ ކަމަކީ ކަރަން އާއި އަދިތިޔާ އަކީ ޝާހްރުކްގެ އެންމެ ކާމިޔާބު ފިލްމުތަކުގެ ޑައިރެކްޓަރުންކަމެވެ. ބަތަލާ ރާނީ
މުކަރްޖީގެ ފިރިމީހާ، އަދިތިޔާ އަކީ ޝާހްރުކްގެ ދިލްވާލޭ ދުލްހަނިޔާ ލޭޖާއޭގޭ (ޑީޑީއެލްޖޭ) އާއި "މުހައްބަތޭން" ގެ އިތުރުން "ރަބް ނެ ބަނާދީ ޖޯޅީ" ގެ ޑައިރެކްޓަރެވެ. ކަރަން އަކީ ޝާހްރުކްގެ "ކުޗް ކުވް ހޯތާ ހޭ" އާއި "ކަބީ ހުޝީ ކަބީ ޢަމް" އާއި "ކަބީ އަލްވިދާ ނާ ކެހެނާ" އަދި "މައި ނޭމް އިޒް ޚާން" ގެ ޑައިރެކްޓަރެވެ.
ފަރާ އަކީ ޝާހްރުކްގެ "މޭ ހޫ ނާ" އާއި "އޯމް ޝާންތީ އޯމް" ގެ ޑައިރެކްޓަރެވެ.
މި ކާމިޔާބު ޑައިރެކްޓަރުންގެ ފަރާތުން އަރިއަން އެކްޓިން އަށް ނެރެދޭން ޝާހްރުކަށް ހުށަހެޅުންތަކެއް ލިބެމުން ދިޔަ ނަމަވެސް އެމެރިކާ އިން ފިލްމު މޭކިން ކިޔަވާފައިވާ އަރިއަން، 26، މިހާތަނަށް އެކްޓިން އަށް އެއްވެސް ޝައުގުވެރިކަމެއް ދީފައެއް ނުވެ އެވެ. އަދި ޝާހްރުކް މީގެ ކުރިން އެތައް އިންޓަވިއުއެއްގައި ވެސް އަރިއަން ފިލްމު ކުޅެން ބޭނުން ނުވާ ކަމަށް ބުނެފައިވެ އެެވެ.
ނަމަވެސް އޭނަގެ ކިބައިގައި "ސްޓާ ކޮލިޓީ" ވަރަށް ބޮޑަށް ހުރި ގަބޫލު ކުރެވޭތީ ޑައިރެކްޓަރުންނާއި ޕްރޮޑިއުސަރުންގެ ލޯ އަމާޒު ވަނީ އެވެ.
އަރިއަން މިހާރު އަންނަނީ އަމިއްލަ އަށް ލިޔުނު ސްކްރިޕްޓަކަށް ޑައިރެކްޓްކުރި ވެބް ސީރީޒް "ސްޓާޑަމް" ގެ ޕޯސްޓް-ޕްރޮޑަކްޝަން މަސައްކަތް ކުރަމުންނެވެ. ރިޕޯޓްތަައް ބުނާ ގޮތުން އެ ގެނެސްދޭނެ ސްޓްރީމިން ޕްލެޓްފޯމަކާއި ޕްރީމިއާކުރާނެ ތާރީހެއް މި އަހަރުގެ ތެރޭގައި އިއުލާން ކުރާނެ އެވެ.
އަރިއަން ފިލްމު ކުޅެން ބޭނުން ނުވިޔަސް އޭނަގެ އަންހެން ކޮއްކޮ ސުހާނާ ޚާން، 24، އަކީ މިހާރު ބަތަލާއެކެވެ. އޭނަގެ ފުރަތަމަ ފިލްމަކީ މިދިޔަ އަހަރު ޑައިރެކްޓަރު ޒޯޔާ އަޚްތަރު ނެޓްފްލިކްސް އަށް ގެނެސްދިން "ދި އާޗީސް" އެވެ. އަދި ސުހާނާ މިހާރު އަންނަނީ ބައްޕައާ އެކީ "ކިންގް" ކިޔާ ފިލްމަކަށް ތައްޔާރުވަމުންނެވެ.
ސުޖޯއި ގޯޝް ޑައިރެކްޓްކުރާ އެ ފިލްމުގެ ޝޫޓިން މި އަހަރުގެ ޑިސެމްބަރު ނުވަތަ އަންނަ ޖެނުއަރީގައި ފަށާނެ އެވެ.