ރާއްޖޭގައި ހުރި ބައެއް އެމްބަސީތައް ކައިރީގައި އަޑުއުފުލާ ފުލުހުންގެ ވާޖިބު އަދާކުރުމަށް ހުރަސްއެޅި މައްސަލައިގައި ހައްޔަރު ކުރި ދެ މީހުން ޝަރުތު ކުރުމަށްފަހު ބަންދުން ދޫކޮށްލައިފިއެވެ.
މި މައްސަލައިގައި އޮގަސްޓް 28 ވަނަ ދުވަހު ހައްޔަރު ކޮށްފައިވަނީ ޑރ. މުހައްމަދު އިޔާޒުގެ އަނބިކަނބަލުން އާއިޝަތު ޝާދިޔާ އާއި ޑރ. ޝަޒްރާ އިބްރާހީމެވެ.
މީގެކުރިން ދެ ފަހަރެެއްގެ މަތިން މި ދެމީހުންގެ ބަންދު މުއްދަތު ޖެހިއިރު ފުލުހުން މިއަދު ބުނެފައިވަނީ، މި ދެމީހުންގެ ބަންދު މުއްދަތު ޖެހުމަށް މިއަދު ކޯޓަށް ހާޒިރު ކުރުމުން ޝަރުތު ކުރުމަށްފަހު ދެމީހުން ބަންދުން ދޫކޮށްލާފައިވާ ކަމަށެވެ.
މި މައްސަލައިގައި ނެރުނު ބަޔާނެއްގައި ފުލުހުން މީގެކުރިން ބުނެފައިވަނީ، ސުލްހަވެރިކަމާއެކު އެއްވެއުޅުމުގެ މިނިވަންކަމުގެ ގާނޫނާ ހިލާފަށް، އާއިޝަތު ޝާދިޔާ އާއި ޑރ. ޝަޒްރާ އިބްރާހީމް ޑިޕްލޮމެޓިކް މިޝަންތަކުގެ ކައިރިއަށް ތަކުރާރުކޮށް އެއްވެ އަޑުގަދަކުރާ ބޭނުންކޮށްގެން ހަޅޭލެވުމާއި ބޭއަދަބީ ބަހުރުވައިން މުއާމަލާތްކޮށް ޑިޕްލޮމެޓިކް މިޝަންތަކުގެ މަސައްކަތަށް ހުރަސް އެޅޭގޮތަށް އަމަލުކުރުމުގެ އިތުރުން ވަކި ސަފީރަކަށް އުނދަގޫ ކުރުމުގެ އަމަލުތަކެއް ހިންގަމުން ގެންދިއުމާ ގުޅިގެން، އެސަރަހައްދުން ދިއުމަށް ފުލުހުން އެންގުމުންވެސް އެކަމަށްވެސް އިންކާރުކޮށް ފުލުހުންގެ ވާޖިބު އަދދާކުރުމަށް ހުރަސްއަޅާފައިވާ ކަމަށެވެ. ފުލުހުން ބުނެފައިވަނީ މި މީހުން ހައްޔަރު ކުރުމުގެ ކުރިން މި އަމަލުތައް ތަކުރާރު ނުކުރުމަށް އެމީހުންނަށް ތަކުރާރުކޮށް ނަސޭހަތްދީފައިވާ ކަމަށެވެ.