ހިންދީ ސިނަމާގެ ކަޕޫރަށް ޚާންދާނަށް ނިސްބަތްވާ އެކްޓަރު އާދާރު ޖެއިން އާއި ލޯބިވެރިޔާ އަލޭކާ އަދުވާނީ ރާއްޖޭގައި އެންގޭޖްވެއްޖެ އެވެ.
އެ މީހުންގެ އެންގޭޖްމަންޓް "ވަރަށް ރޮމޭންޓިކްކޮށް" މި ހަފުތާގައި އޮތީ ޖޭޑަބްލިއު މެރިއަޓް މޯލްޑިވްސް ރިސޯޓް އެންޑް ސްޕާގަ އެވެ. އެންގޭޖްމަންޓް ދަތުރުތަކެއް ފޮޓޯތަކެއް އާދާރާއި އަލޭކާގެ އިންސްޓަގްރާމްގައި ޕޯސްޓްކޮށްފައިވެ އެވެ.
އާދާރު އާއި އަލޭކާ އެންގޭޖްވި އިރު، އެ ދެ މީހުން ޑޭޓްކުރަމުން އަންނަނީ މިދިޔަ އަހަރުގެ ފަހުކޮޅުން ފެށިގެންނެވެ. ފިލްމީ އެއްވެސް ކަމަކާ ގުޅުމެއް ނެތް އަލޭކާ އަކީ ވެލްނެސް ކުންފުންޏެއް ކަމަށްވާ "ވޭ ވެލް" ގެ ބާނީ އެވެ.
އާދާރު އަކީ މަޝްހޫރު ތަރިން ކަމަށްވާ ކަރީނާ ކަޕޫރާއި ރަންބީރްގެ ކަޕޫރްގެ ކަޒިންއެކެވެ.
ބޮލީވުޑުން މިހާތަނަށް މާ ބޮޑު ކުރިއެރުމެއް ހޯދިފައި ނުވާ އާދާރު، 28، ކުރިން ރައްޓެހިވެގެން އުޅުނީ 2019 ގެ "ސްޓޫޑެންޓް އޮފް ދި އިޔާ 2" އިން ބޮލީވުޑަށް ނުކުތް ބަތަލާ ތާރާ ސުތާރިއާ، 28، އާ އެވެ. އެ ދެ މީހުން މިދިޔަ އަހަރުގެ ކުރީކޮޅު ރުޅިވި އިރު، ކައިވެނީގެ ވާހަކަ ވެސް ވަރަށް ބޮޑަށް ދެކެވިފައިވެ އެވެ. އާދާރާއި ތާރާ ރައްޓެހިވެގެން އުޅުނު ދެ ފަހަރެއްގެ މަތިން ރާއްޖޭގައި ޗުއްޓީ ވެސް ހޭދަކޮށްފައިވެ އެވެ.
ރިޕޯޓްތައް ބުނާ ގޮތުން ތާރާ މިހާރު ރައްޓެހިވެގެން އުޅުނީ ފިލްމުތަކުގައި ސަޕޯޓިން ރޯލުތަކުން ފެންނަ އެކްޓަރެއް ކަމަށްވާ އަރުނަދޯއި ސިންގް، 41، އާ އެވެ. އޭނަ އަކީ ކުރިން ކައިވެންޏެއްކޮށް، އެ ކައިވެނި ރޫޅިފައިވާ މީހެކެވެ.
ހިންދީ ސިނަމާގެ "ޝޯމޭން" ގެ ނަމުން މަޝްހޫރު ވަރުގަދަ ޝަހުސިއްޔަތު ރާޖް ކަޕޫރަށް ކާފަ ކިޔާ އާދާރު ކުޅުނު ފިލްމުތަކަކީ 2021 ގެ "ހެލޯ ޗާލީ" އާއި 2017 ގެ "ގައިދީ ބޭންޑް" އެވެ.