Last Updated: September 16, 22:20
Monday, September 16, 2024
ޚަބަރު

ފޭރުނު ދެ މީހުންގެ ބަންދަށް 15 ދުވަސް

ދެ މީހެއްގެ ކަރުގައި ވަޅި ޖައްސައިގެން ފޭރުނު ދެ މީހުންގެ ބަންދަށް 15 ދުވަސް ކްރިމިނަލް ކޯޓުން މިއަދު ޖަހައިފި އެވެ.

މި މައްސަލައިގައި ހައްޔަރުކޮށްފައިވަނީ މ. ދާރުލްގަރާރު، އިސްމާއިލް ވިޝާލް، 30، އާއި ވިދުވަރު، ބ. ދަރަވަންދޫ، ހުސައިން ޝާއިފް، 32، އެވެ.

އެ ދެ މީހުންގެ ބަންދު އަމުރުގައިވާ ގޮތުން އެ މީހުނަށް ތުހުމަތުކޮށްފައި ވަނީ ތޫނު ހަތިޔާރު ބޭނުންކޮށްގެން ބިރު ދައްކައިގެން ފޭރުމެވެ. ދެ މީހުންގެ ބަންދަށް ވެސް ކޯޓުން ވަނީ 15 ދުވަސް ޖަހާފަ އެވެ.

ފުލުހުން ބުނީ، މާފަންނުގައި ހުރި ގެއެއްގެ ފާޚަނާ ފެންލައިޓުން ވަދެ، ކޮޓަރީގައި ނިދާފައި ތިބި ދެ މީހެއްގެ ކަރުގައި ވަޅި ޖައްސައި، އެއްވެސް ހަރަކާތެއް ކޮށްފިނަމަ މަރާލާނެ ކަމަށް ބުނެ، ބިރުދައްކާފައިވާ ކަމަށެވެ.

ކޮޓަރީގައި ތިބި ދެ މީހުންގެ މޮބައިލް ފޯނާއި، ލެޕްޓޮޕެއްގެ އިތުރުން އެހެނިހެން ތަކެތި ފޭރުނު މައްސަލަ އިއްޔެ ރިޕޯޓުކުރި ކަމަށް ފުލުހުން ބުންޏެވެ.

އެ ތަކެތި ފޭރުމަށް ފަހު އެ ދެ މީހުން ފިލައިގެން ގޮސްފައިވަނީ އަލުން ފާޚަނާއަށް ވަދެ، އެތެރެއިން ދޮރު ތަޅުލުމަށް ފަހު ފެންލައިޓުން ނުކުމެގެން ކަމަށް ފުލުހުން ބުންޏެވެ. އެ ދެ މީހުން ރޭގެ ވަގުތެއްގައި ހައްޔަރުކޮށް، ފޭރުނު ލެޕްޓޮޕާއި މޮބައިލް ފޯނުތަކުގެ އިތުރުން ފޭރުނުކަމަށް ތުހުމަތުކުރާ އެހެނިހެން ތަކެތި ފުލުހުން ވަނީ ހޯދާފަ އެވެ.