ހުޅުމާލޭގައި އިއްޔެ އެކްސިޑެންޓެއްގައި ޒުވާނަކު މަރުވެފައިވާ އިރު، މިއަދު އަނެއްކާ ވެސް ސައިކަލަކާއި ކާރެއް އެކްސިޑެންޓްވެ، ޒުވާނަކަށް އަނިޔާވެއްޖެ އެވެ.
މިއަދު ހެނދުނު 7:00 ޖަހަން އުޅެނިކޮށް ހިނގި އެ އެކްސިޑެންޓު ހިނގީ ހުޅުމާލޭ ފޭސް ދޭއްގަ އެވެ. އެ ހާދިސާގައި ސައިކަލް ދުއްވަން އިން 20 އަހަރުގެ ޒުވާނާ އަށް ސީރިއަސް އަނިޔާތަކެއް ލިބިފައިވާ ކަމަށް ފުލުހުން ބުންޏެވެ. އަދި އޭނަ އަށް އަންނަނީ ހުޅުމާލޭ ހޮސްޕިޓަލްގައި ފަރުވާ ދެމުންނެެ.
ނަމަވެސް އޭނަ އަށް ލިބުނު އަނިޔާގެ ތަފުސީލެއް ފުލުހުން ހާމައެއް ނުކުރެ އެވެ.
މަންޒަރު ދުށް ބައެއް މީހުން ބުނެފައިވާ ގޮތުގައި އެކްސިޑެންޓް ހިނގަން ދިމާވީ ބާރު ސްޕީޑްގައި ދުއްވި ކާރާއި ބާރަށް ގޯޅިއަކުން ނުކުތް ސައިކަލު ޖެހިގެންނެވެ.
ބާރަށް ދުއްވާ މީހުންގެ މައްސަލަ ބޮޑުވެ، ސަރުކާރުން މިހާރު ވަނީ އެފަދަ މީހުންނަށް ހަރުކަށި ފިޔަވަޅު އަޅާނެ ކަމަށް ބުނެފަ އެވެ. އަދި މި ފަހަކަށް އަައިސް މާލެ ސަރަހައްދުގައި ބާރު ސްޕީޑްގައި ރޭސް ކާރު ދުއްވުން އިތުރުވެ، އެފަދަ ހާދިސާތަކުގައި މީހުންގެ ފުރާނަ ގެއްލެމުންދާތީ ހުޅުމާލޭގައި ރޭސިން އަށް ދީފައިވާ ހުއްދަ މިހާރު ވަނީ ބާތިލު ވެސްކޮށްފަ އެވެ.
އިއްޔެ މަރުވި ޒުވާނާ އަކީ ބާރު ސްޕީޑްގައި ދުއްވި ރޭސް ކާރަކުން ޖެހި، ބޮޑެތި އަނިޔާތަކެއް ލިބުނު މީހެކެވެ.