* އޭނާގެ ފުރާނައާ ހަވާލުވެވަޑައިގަތުމަށްޓަކައި ފައިބައިވަޑައިގަންނަވާނީ ކަޅު އަނދިރި މޫނުތަކެއްގެ ވެރި މަލާއިކަތުންތަކެކެވެ.
* އެ ބޭކަލުން އެނުބައި ފުރާނައަށްޓަކައި ގެންނަވާނީ ވޭނާއި އަނިޔާ ލިބޭފަދަ ކަފުނެކެވެ.
* މަލަކުލް މައުތުގެފާނު އެނުބައި ފުރާނައާއި މުޚާތަބުކޮށް ވިދާޅުވާނެއެވެ: "އޭނުބައިވެގެންވާ ނަފްސެވެ. ތިބާ ﷲގެ ކޯފާގެ ތެރެއަށް ނިކުމެގެން އަންނާށެވެ."
* އޭނާގެ ފުރާނަ އޭނާގެ ހަށިގަނޑާއި ވަކިވެގެންދާނީ ކަށި ހުރި އޮފިގަނޑެއް ކަފަގަނޑެއްގެ ތެރެއަށްލައިފައި ދަމައިގަތުމުން ވީދިގެން އަންނަފަދައިން ވޭންހުރި ގޮތެއްގަ އެވެ.
* އެ ނުބައި ފުރާނައާއިގެން މަލާއިކަތުން ދުނިޔޭގެ އުޑާއި ހަމައަށް ވަޑައިގަތުމުން ދުނިޔޭގެ އުޑުގެ ދޮރުކޮޅު އޭނާއަށްޓަކައި ހުޅުވައިނުލެވޭނެއެވެ.
* އެ ނުބައި ފުރާނައާއި ބެހޭގޮތުން މަލާއިކަތުން ސުވާލުކުރެއްވުމުން އޭނާއަށް ދުނިޔެމަތީގައި ކިޔައިއުޅުނު އެންމެ ނުބައި ނަމުން އެ ބޭކަލުން އޭނާގެ ތަޢުރީފް ބަޔާން ކުރައްވާނެ އެވެ.
* އެހިނދު ﷲ ތަޢާލާ ވަޙީކުރައްވާނެއެވެ: "އޭނާގެ ޢަމަލުތަކުގެ ފަތް، ބިމުގެ އެންމެ އަޑީގައިވާ ނުބައި އަޅުތަކުންގެ ނަންތައް ލިޔުއްވޭ "އައްސިއްޖީން" އޭ ކިޔުނު ފޮތުގައި ލިޔުއްވާށެވެ."
* ކަށްވަޅުގެ ސުވާލުތަކަށް ޖަވާބު ނުދެވުމުން އޭނާގެ މޫނުމަތީގައި މަރުތެއްޔަކުން ވަރުގަދަ އެތިފަހަރެއް ޖަހާލެވޭނެ އެވެ.
* އެހިނދު އޭނާ ލަވާ ވޭނީ ހަޅޭކުގެ އަޑު އިންސާނުންނާއި ޖިންނީން ފިޔަވައި ހުރިހާ މަޚްލޫޤުންނަށް އަޑު އިވޭނެ އެވެ.
* އޭނާއަށްޓަކައި އަލިފާނުންވާ ތަންމައްޗެއް ތައްޔާރު ކުރެވޭނެ އެވެ.
* ނަރަކައިން ދޮރެއް ހުޅުވައިލެވި ޖަހަންނަމައިގެ އަލިފާނުގެ ހޫނާއި އެތަނުގެ ނުބައިވަސް އޭނައަށް ލިބިލިބި ހުންނާނެ އެވެ.
* އޭނާގެ މޭމަތީގެ ކަށިތައް އެއްކަށިގަނޑު އަނެއްކަށީގެ ތެރެއަށް މަހާލެވިގެންދާ މިންވަރަށް ކަށްވަޅު އޭނާގެ މައްޗަށް ފިއްތާލެވޭނެ އެވެ.
* އޭނާ ކުރި ނުބައި ޢަމަލްތައް، ހުތުރު ސިފައެއްގައި، ހަޑި ފޭރާމެއްގައި، ނުބައިވަސްދުވާ މީހެއްގެ ސިފައިގައި އައިސް، އޭނާއަށްޓަކައި ޖަހަންނަމައިގެ ތައްޔާރުކުރެވިފައިވާ ޢަޒާބުގެ ބިރުވެރި ޚަބަރުތައް ދެމުންދާނެ އެވެ.
އެހިނދު އެގަދަފަދަ ވޭންދެނިވި ޢަޒާބުގެ ވާހަކަތައް އަޑު އިވުމުން ޤިޔާމަތް ގާއިމް ނުކުރެއްވުން އެދި އޭނާ ﷲ އަށް ދުޢާކުރާނެއެވެ.
(ނޯޓް: މި މައުޟޫމާތަކީ ސަޙީހުލް ބުޚާރީއާއި، މުސްނަދު އަޙްމަދުގައިވާ ސައްޙަ ޙަދީޘްފުޅުތަކުގައި ވާރިދުވެފައިވާ ވާހަކަތަކެކެވެ.)
ނޯޓް: މިއީ ޝައިހް އަހުމަދު ރިމާޒުގެ ލިޔުއްވުމެކެވެ.