އޮލިމްޕަހުގައި ހައުސްފުލް ޝޯތަކެއް ދައްކަމުން އަންނަ ފިލްމު "ކަމަނާ" އައްޑޫގައި ވެސް އަޅުވާ ގޮތަށް ހަމަޖެހިއްޖެ އެވެ.
ރާއްޖޭގެ އެކި ހިސާބުތަކުގައި މި ފިލްމު އަޅުވަމުން އަންނަ އިރު، އައްޑޫގައި އަދި ހަމަޖެހިފައި އޮތް ގޮތުން ޝޯއެއް ދައްކަން ހަމަޖެހިފައި ވަނީ ހަމައެކަނި ހުޅުމީދޫގަ އެވެ. އެއީ މި މަހުގެ 21 ވަނަ ދުވަހުގެ ރޭގަ އެވެ. އެ ޝޯގެ ޓިކެޓަށް ވެސް މިހާރު ވަނީ ހުޅުވާލައިފަ އެވެ.
ދާދި ފަހުން ހުޅުމީދޫގައި ވަނީ މިދިޔަ މަހު ގެނެސްދިން ލޯބީގެ ބިރުވެރި ފިލްމު "ސާޔާ" ވެސް ދައްކައިފަ އެވެ.
މިދިޔަ މަހުގެ 27 ގައި ޕްރީމިއާކުރި "ކަމަނާ" އަށް ލިބެމުން އަންނަ ބޮޑު ތަރުހީބާ އެކީ ޝޯތައް ހައުސްފުލްވެ، މާލޭގައި ފިލްމު ބަލަން ބޭނުންވާ މީހުން ވަރަށް ބޮޑަށް އިތުރުވެފައިވާތީ ދަންވަރު ޝޯތަކެއްގެ އިތުރުން މިހާރު ވަނީ މެންދުރު ފަހުގެ ޝޯތަކަކަށް ވެސް ހުޅުވާލައިފަ އެވެ.
ރާއްޖޭގެ އެކިއެކި ހިސާބުތަކުގައި "ކަމަނާ" އަޅުވަން ތާވަލުކޮށްފައިވާ އިރު މި މަހުގެ 10 ގައި ސްރީ ލަންކާގައި ވެސް ފިލްމު ދައްކަން ވަނީ ހަމަޖެހިފަ އެވެ.
"ކަމަނާ" އަކީ މަހުދީ އަހުމަދުގެ ސްކްރީންޕްލޭއަކަށް ހުސައިން މުނައްވަރު ޑައިރެކްޓްކޮށްފައިވާ ފިލްމެކެވެ. ޕްރޮޑިއުސަރު ޝާނީޒް އަލީގެ ސެޓާން ސްޓޫޑިއޯ އިން ޕްރޮޑިއުސްކޮށްފަިވާ ފިލްމުގެ މީގެ ލީޑް ކާސްޓްގައި ހިމެނެނީ މަރިޔަމް އައްޒަ އާއި ޔޫސުފް ޝަފީއު (ޔޫއްޕެ) ގެ އިތުރުން ރަޝްފާ (އާޝާ) އެވެ.