ބެލުންތެރިންނަށް ގެނެސްދޭން ތައްޔާރުވަމުން އަންނަ ފިލްމު "ބިބީ" ގައި ކުޅެފައިވާ ކެރެކްޓާ އަކީ ކެރިއަރުގައި މިހާތަނަށް ކުޅުނު އެންމެ ތަފާތު ރޯލު ކަމަށް މަޝްހޫރު ބަތަލާ ޝީލާ ނަޖީބު ބުނެފި އެވެެ.
ޑާކް ރެއިން އެންޓަޓައިންމަންޓުން އަންނަ މަހު ބެލުންތެރިންނަށް ދޫކޮށްލަން އުޅޭ ހޮރޯ-ކޮމެޑީއާ ބެހޭ ގޮތުން ކާމިޔާބު އެތައް ފިލްމެއް ކުޅެފައިވާ ތަޖުރިބާކާރު ބަތަލާ ބުނީ އޭނަގެ ވަރަށް ތަފާތު ރޯލެއް ބަލަން ބެލުންތެރިން ބޭނުންވާ ނަމަ އެ ފިލްމަކީ "ބިބީ" ކަމަށެވެ.
"ޝީލާ ކުރިން ނޫޅޭ ކަހަލަ ގޮތަކަށް މީގައި މުޅިން ފެންނާނީ. މި ފަހަރު ހަމަ ވަރަށް ތަފާތު ރޯލަކުން ފެނިގެން ދާނީ." މަޝްހޫރު އެކްޓަރު މުހައްމަދި މަނިކުގެ އަންހެނުން ބުންޏެވެ.
ޝީލާ ބުނި ގޮތުގައި "ބިބީ" އަކީ މުޅިން އާ ޑައިރެކްޓަރަކާ އެކީ ކުރެވުނު ވަރަށް ހިތްހަމަޖެހޭ މަސައްކަތެކެވެ. އެގޮތުން "ބިބީ" ލިޔެ، ޑައިރެކްޓްކުރި ޝަހުދާ މަހުމޫދަކީ ވަރަށް ރަނގަޅަށް ސީންތައް ކިޔައިދޭ ޑައިރެކްޓަރެއްކަމުން މަސައްކަތް ކުރަން ވަރަށް ފަސޭހަވި ކަމަށް ބުންޏެވެ. އަދި ޑައިރެކްޓަރު އެންމެ ބޭނުންވި ގޮތަށް މަސައްކަތް ކުރެވިފައި ވާނެ ކަމަށް ޝީލާ ބުންޏެވެ.
އޭނަ ބުނި ގޮތުގައި "ބިބީ" އަކީ ފޫހިކަމެއް ނެތި ބެލުންތެރިން ވަރަށް ޝައުގުވެރިކަމާ އެކީ ބަލާނެ ފިލްމަކަށް ވާނެކަމުގެ ޔަގީންކަން އެބައޮތެވެ. އެހެންވެ އެންމެން ވެސް މި ފިލްމު ބަލަން ދިއުމަކީ ޝީލާގެ ވަރަށް ހާއްސަ އެދުމެކެވެ.
"ބިބީ" އޮލިމްޕަހުގައި ޕްރީމިއާކުރަމް ހަމަޖެހިފައި ވަނީ އަންނަ މަހުގެ 7 ގަ އެވެ.
ޕްރޮޑިއުސަރު މުހައްމަދު އަލީ (މޮގާ) އާއި އަންހެނުން އައިޝަތު ފުއާތު ތައުފީގް ޕްރޮޑިއުސްކޮށްފައިވާ މި ފިލްމުގެ މައިގަނޑު ކާސްޓްގައި ހިމެނެނީ ޝަރަފް އަބްދުﷲ އާއި މަރިޔަމް މަޖުދާ (މަޖޫ) އާއި ޝީލާ ނަޖީބުގެ އިތުރުން އަބްދުﷲ ޝާފިއު (ފުބޫ) އެވެ. މި ތަރިންނާ އެކީ އިތުރު ގިނަ ފަންނާނުންތަކެއް ފިލްމުން ފެނިގެން ދާނެ އެވެ.