ގައުމީ ދުވަހުގެ ހަރަކާތްތަކުގައި ބައިވެރިވެވަޑައިގަތުމަށް ށ. އަތޮޅަށް ކުރެއްވި ދަތުރުފުޅު ނިންމަވާލެއްވުމަށްފަހު ނައިބު ރައީސް ހުސައިން މުހައްމަދު ލަތީފް މާލެ ވަޑައިގެންފިއެވެ.
ނައިބު ރައީސް ށ. އަތޮޅަށް ވަޑައިގެންފައިވަނީ އިއްޔެއެވެ. އަދި ދަތުރުފުޅު ނިންމަވާލެއްވުމަށްފަހު މާލެ ވަޑައިގެންފައިވަނީ މިއަދު ހެނދުނުއެވެ.
އަތޮޅު ފެންވަރުގައި ޤައުމީ ދުވަސް ފާހަގަކުރުމަށް ށ. އަތޮޅަށް ކުރެއްވި ދަތުރުގައި މާއުނގޫދޫ އާއި ފުނަދޫއިން ކީ ހޫނު މަރުޙަބާ މެހެމާންދާރީއަށް ނައިބުރައީސް ވަނީ ޝުކުރު އަދާކުރައްވާފައެވެ.
މިދަތުރުފުޅުގައި ނައިބު ރައީސް ވަނީ މާއުނގޫދޫގައި ބޭއްވި ޖަލްސާގައިވެސް ބައިވެރިވެވަޑައިގެންފައެވެ.
ރާއްޖޭގައި ޤައުމީ ދުވަސް ފާހަގަކުރަމުން އަންނަނީ، އައްސުލްޠާނުލް ޣާޒީ މުޙައްމަދު ތަކުރުފާނުލް އަޢުޡަމް ސިރީ ސަވާދީއްތަ މަހާރަދުން، ޕޯޗުގީޒުންގެ އަޅުވެތިކަމުން ރާއްޖެ ސަލާމަތްކޮށް ދެއްވުމުގެ ޒިކުރާ އައުކުރުމުގެ ގޮތުން ކޮންމެ އަހަރަކު ވެސް ރަބީޢުލްއައްވަލް މަހުގެ 1 ވަނަ ދުވަހުއެވެ.