އެއްލައިލި ސިނގިރޭޓު ފޮށިން 9 ގްރާމުގެ ޑްރަގްސް ފެނުނު މައްސަލައެއްގައި މީހެއްގެ މައްޗަށް އުމުރު ދުވަހުގެ ޖަލު ހުކުމެއް އިއްވައިފިއެވެ.
މި މައްސަލައިގައި ޑައިމޯފިން ޑްރެފިކް ކުރުމުގެ ކުށުގެ ދައުވާ އުފުލާފައިވަނީ މއ. ސިޓީވިލާ / ކ.މާލެ ހަސަން ސިފާހުގެ މައްޗަށެވެ.
މީނާގެ މައްޗަށް އުފުލާފައިވާ ދައުވާގައި ބުނެފައިވަނީ 2022 ފެބްރުއަރީ 7 ވަނަ ދުވަހު އިތުރު މީހަކާއެކު މިނާ ސައިކަލުގައި ދަނިކޮށް، ސައިކަލު މަޑުކުރުމަށް ފުލުހުން އެންގުމުން، މީނާ ސައިކަލުން ފައިބައިގެން ދާން ފެށިކަމަށެވެ. އަދި މީނާ ގާތު މަޑުކުރުމަށް ފުލުހުން އެންގުމުން މަލްބަރޯ ބްރޭންޑުގެ ސިނގިރޭޓް ފޮށްޓެއް ބިންމައްޗަށް ވައްޓާލުމަށްފަހު ދުއްވައިގަނެފައިވާ ކަމަށެވެ. ފުލުހުން މީނާ ހުއްޓުވާ، މީނާގެ ހާޒިރުގައި އެއްލާލި ސިނގިރޭޓް ފޮށި ބެލިއިރު އޭގެތެރެއިން 95 ރަބަރު ޕެކެޓު ފެނުނު ކަމަށް ދައުވާގައި ބުނެފައިވެއެވެ. އަދި މިތަކެތީގެ ބަރުދަނުގައި 9.3124 ގްރާމު ހުރި ކަމަށްވެސް ބުނެފައިވެއެވެ.
ކްރިމިނަލް ކޯޓުގައި މީނާ ވަނީ މި ދައުވާއަށް އިންކާރު ކޮށްފައެވެ. އަދި ދައުވާގައި ބުނާފަދަ ކުށުގެ އަމަލެއް ހިންގާފައި ނުވާނެ ކަމަށާއި، މަލްބަރޯ ފޮށްޓެއްވެސް އަދި އެހެން ފޮށްޓެއްވެސް އެއްލާފައިވާ ނުވާ ކަމަށާއި އަދި ފުލުހުން މި މައްސަލައިގައި ހޯދާފައިވާ މަސްތުވާ ތަކެތި ކަމަށްބުނާ ތަކެއްޗާއި އެއްވެސް ގުޅުމެއް ނެތް ކަމަށް ބުނެފައިވެއެވެ.
މި ދައުވާ ސާބިތު ކުރުމަށް ދައުލަތުން ހުށަހެޅި ހެކިތަކަށް ރިއާޔަތްކޮށް ކްރިމިނަލް ކޯޓުން ވަނީ މީނާގެ މައްޗަށް ކުށް ސާބިތުވާ ކަމަށް ކަނޑައަޅާފައެވެ. އެހެންކަމުން ސެޕްޓެމްބަރު 3 ވަނަ ދުވަހު ކްރިމިނަލް ކޯޓުން ވަނީ މީނާގެ މައްޗަށް އުމުރަށް ޖަލަށްލުމާއެކު 100،000 ރުފިޔާއިން ޖުރިމަނާ ކުރުމަށް ހުކުމް ކޮށްފައެވެ.