Last Updated: April 3, 22:50
Thursday, April 3, 2025
ޚަބަރު ޕޮލިސް

ވަޅިން ބިރުދައްކައި ފޭރުނު މީހެއްގެ ބަންދަށް 15 ދުވަސް

Police
ފުލުހުން މާލޭގެ މަގުމަތީގައި ހަރަކާތްތެރިވަނީ- ފޮޓޯ: ފުލުހުން

ގެސްޓް ހައުސްއަކަށް މީހަކު ވައްދާ، ވަޅިން މީހަކަށް ބިރުދައްކާ ފައިސާ ފޭރުނު މީހަކު ހައްޔަރުކޮށް ބަންދަށް 15 ދުވަސް ޖަހައިފިއެވެ. 

މި މައްސަލައިގައި ކޯޓު އަމުރެއްގެ ދަށުން ހައްޔަރު ކޮށްފައިވަނީ 41 އަހަރުގެ އިކްލީލް އިބްރާހިމް، ގއ. ކަނޑުހުޅުދޫ / ވިދާތަރިއެވެ. މީނާގެ ބަންދު މުއްދަތު ޖެހުމަށް މިއަދު ކްރިމިނަލް ކޯޓަށް ހާޒިރު ކުރުމުން އެ ކޯޓުން ވަނީ މީނާގެ ބަންދަށް 15 ދުވަހުގެ މުއްދަތެއް ދީފައެވެ 

މީނާގެ ބަންދު މުއްދަތުޖެހި ކޯޓު އަމުރުގައި ބުނެފައިވަނީ ގެސްޓް ހައުސްއަކަށް މީނާއާއި އިތުރު މީހަކު ބައިވެރިވެގެން މީހަކު ވައްދާފައިވާ ކަމަށެވެ. އަދި އެއަށްފަހު އެމީހާއަށް ވަޅިން ބިރުދައްކައި، ބޭންކް އެޕްލިކޭޝަން މެދުވެރިކޮށް އަދި ކޭޝްކާޑް މެދުވެރިކޮށް 53،000 ރުފިޔާ ފޭރިގަނެފައިވާ ކަމަށް ތުހުމަތު ކުރެވޭ ކަމަށެވެ. މި މައްސަލައިގައި ފޭރުނު ފައިސާގެ ތެރެއިން ގިނަ ފައިސާ ޖަމާކޮށްފައިވަނީ މީނާގެ ނަމުގައި އެމްއައިބީގައި ހުޅުވާފައިވާ އެކައުންޓަކަށް ކަމަށްވެސް ބުނެފައިވެއެވެ.

މީނާއާ ގުޅޭ އިންޓެލިޖެންސް ރިޕޯޓުގައި، ހަށިވިއްކުމުގެ ވިޔަފާރީގައި ބައިވެރިވާކަމަށް ތުހުމަތުކުރެވޭ ފަރާތަކާއެކު މީނާ ހަށިގަތުމަށް ގުޅި ފަރާތް ކޮޓަރިއަކަށް ގެނެސް ބިރު ދައްކާ ފައިސާ ފޭރިގަނެފައިވާކަން ފާހަގަ ކޮށްފައިވެއެވެ. އަދި އޮގަސްޓް އަދި ސެޕްޓެމްބަރު މަހުވެސް މިފަދަ 6 އިންސިޑެންޓެއް ހިނގާފައިވާކަން ފާހަގަ ކޮށްފައިވެއެވެ.

މި މައްސަލައިގައި މީނާ ކޯޓުގައި ބުނެފައިވަނީ، މީނާ ދިރިއުޅެނީ އެހެން ގެއެއްގައި ކަމަށާއި ނަމަވެސް ބްރެއިން ޓީއުމަރެއްގެ މައްސަލައިގައި އައިޖީއެމްއެޗްއަށް ދައްކަންޖެހޭތީ އެތާ ކައިރިން ކޮޓަރިއެއް ކުއްޔަށް ނަގައިގެން ހުންނަ ކަމަށެވެ. އަދި މީނާ ހުންނަ ކޮޓަރިއަށް މީނާގެ އިތުރުން އިތުރު މީހުންވެސް އަންނަ ކަމަށް ބުނެފައިވެއެވެ.