އަންހެނެއްގެ ކަރުގައި ވަޅި ޖައްސައިގެން ބިރު ދެއްކި މައްސަލާގައި ހައްޔަރުކޮށްފައި ވަނިކޮށް އަމިއްލައަށް ދަންޖެހުމުން ފަރުވާދެމުން ދަނިކޮށް މަރުވި އާދަމް އަތުހަރުގެ ހަށިގަނޑު ޕޯސްޓްމޯޓަމަށްފަހު ރާއްޖެ ގެނެސް މިރޭ ވަޅުލުމަށް ނިންމައިފިއެވެ.
ފުލުހުންގެ ބަންދުގައި ހުއްޓާ ދަންޖެހުމުން، އައިޖީއެމްއެޗްގެ އައިސީޔޫގައި ފަރުވާ ދެމުންދަނިކޮށް އަތުހަރު ނިޔާވެފައިވަނީ މި މަހުގެ 2 ވަނަ ދުވަހުއެވެ.
އޭނާގެ ހަށިގަނޑު ޕޯސްޓްމޯޓަމް ހެދުމަށް ރާއްޖެއިން ބޭރަށް ގެންގޮސްފައިވަނީ މިދިޔަ ބްރާސްފަތި ދުވަހުއެވެ. އޭނާގެ ހަށިގަނޑު ޕޯސްޓްމޯޓަމް ހެދުމަށް ނިންމީ މަރުވި ގޮތް ބެލުމަށެވެ.
އަތުހަރު ވަޅުލުމަށް ހަމަޖެހިފައިވަނީ މިރޭ 10:00 ގައި ހުޅުމާލެ ސަހަރާގައެވެ.
ށ. މިލަންދޫ އަށް ނިސްބަތްވާ 32 އަހަރުގެ އަތުހަރު ފުލުހުންގެ ބެލުމުގެ ދަށަށް ގެންދިޔައީ ބުރާސްފަތި ދުވަހުގެ ރޭ މާލޭގައި، އޭނަ އަންހެނަކު ރަހީނުކޮށް، ކަރުގައި ވަޅި ޖައްސައި ބިރު ދައްކައިގެން ފިލަން މަސައްކަތް ކުރަނިކޮށް، ފުލުހުން މުގުރަކުން އޭނާގެ ބޮލުގައި ޖަހައި ޒަހަމްކޮށްލުމަށް ފަހުއެވެ. ބޮލުގައި މުގުރުން ޖެހުމުން އޭނާއަށް ހޮސްޕިޓަލުގައި ފަރުވާދީފައިވެސްވެއެވެ.