އިޖުތިމާޢީ ބަދަހި މަދަދުވެރިން (އިބަމަ) ގެ ގްރޫޕްތައް އުފެއްދުމަށްޓަކައި ބާއްވާ އިބްތިދާއީ ތަމްރީނު ޕްރޮގްރާމް ދ. އަތޮޅުގައި މިއަދު ފަށައިފި އެވެ.
ފަސް ދުވަހުގެ މުއްދަތަށް ކުރިއަށްގެންދާ މި ތަމްރީނު ޕްރޮގްރާމްގެ ތިއަރީ ބައި ކުރިއަށް ދާނީ ދ. ކުޑަހުވަދޫގަ އެވެ. އަދި މި ތަމްރީނު ޕްރޮގްރާމްގައި ހިމެނޭ ޢަމަލީ މަސައްކަތުގެ ބައި ކުރިއަށް ގެންދާނީ ދ. އަތޮޅުގެ އެކި ރަށްރަށުގަ އެވެ. ސޯޝަލް އެންޑް ފެމިލީ މިނިސްޓްރީން ބުނީ ދ. އަތޮޅުގައި ހިމެނޭ ހަ ރަށުން ޖުމްލަ 42 މީހަކު ޕްރޮގްރާމްގައި ބައިވެރިވާ ކަމަށެވެ.
ޔުނިސެފްގެ އެހީގައި މިނިސްޓްރީން ކުރިއަށް ގެންދާ މި ތަމްރީނު ޕްރޮގްރާމްގައި "އިބަމަ" ގްރޫޕްތައް ރަށްރަށުގައި ޤާއިމުކުރުމުގެ ބޭނުމާއި، އިބަމައިގައި ހިމެނޭ މެންބަރުންގެ ޒިންމާއާއި، އަދާކުރަންޖެހޭ ދައުރާއި، އިޖުތިމާޢީ ޚިދުމަތް ފޯރުކޮށްދިނުމުގެ މަސައްކަތުގައި އިބަމައިގައި ހިމެނޭ މެންބަރުން ސަމާލުކަންދޭންވީ ކަންކަމާއި އަދި އިބަމައިގެ މުހިންމު މަފްހޫމްތަކާ ގުޅޭގޮތުން ވަރަށް ތަފުސީލީ ގޮތެއްގައި ބައިވެރިންނަށް ފޯރުކޮށް ދެވޭނެ އެވެ.
އެއާއެކު، ރަށްރަށުގައި ނާޒުކު ހާލަތުގައި ދިރިއުޅޭ ފަރާތްތައް ދެނެގަންނާނެ ގޮތާއި، އެފަރާތްތަކުގެ ހާލަތު ރަނގަޅު ކުރުމަށް ކުރެވޭ މަސައްކަތުގައި އިބަމައިގެ މެންބަރުންނަށް ކުރެވޭނެ ކަންކަމާއި، އެ މަސައްކަތްތައް ކުރުމަށް މެންބަރުންނަށް ބޭނުން ވާނެ ތަފާތު އެކި ހުނަރާއި ގުޅޭގޮތުންވެސް މި ތަމްރީނު ޕްރޮގްރާމްގައި ބައިވެރިންނަށް މަޢުލޫމާތު ވެސް ފޯރުކޮށް ދެވޭނެ އެވެ.
މީގެ އިތުރުން ރަށްރަށުގައި ދިރިއުޅޭ ނާޒުކު ހާލަތުގައި ތިބި ފަރާތްތަކަށް އެހީތެރިވުމުގެ ގޮތުން އެ ފަރާތްތަކުގެ ހާލަތު ވަޒަންކުރާނެ ގޮތާއި، ހާލަތު ރަނގަޅުކުރުމަށްޓަކައި އަޅާނެ ފިޔަވަޅުތަކާއި ގުޅޭ ޕްލޭން އެކުލަވާލައި ތަންފީޒުކުރުމަށް ބޭނުންވާ ފަންނީ މަޢުލޫމާތު ވެސް ދޭނެ އެވެ.
ދ. އަތޮޅުގެ ރަށްރަށުގައި "އިބަމަ" ގްރޫޕްތައް އުފެއްދުމަށްޓަކައި މި ބާއްވާ ތަމްރީނު ޕްރޮގްރާމްގެ ފުރަތަމަ ތިން ދުވަހު ކުރިއަށް ގެންދެވޭ ތިއަރީ ބައި ނިމުމުން ވުޒާރާގެ ފަރާތުން މި ޕްރޮގްރާމް ކުރިއަށްގެން ދިއުމަށް ކުޑަހުވަދު އަށް ދަތުރުކުރި ޓީމުގެ މެންބަރުންނާއެކު، ތަމްރީނު ޕްރޮގްރާމްގައި ބައިވެރިވި "އިބަމަ" ގެ މެންބަރުން އެ މެންބަރުން ނިސްބަތްވާ ރަށްރަށަށް ގޮސް އެ ރަށްރަށުގައި ތިބި ނާޒުކު ހާލަތުގައި ދިރިއުޅޭ ފަރާތްތައް ދެނެގަނެ އެ ފަރާތްތަކަށް ބޭނުންވާ އެހީތެރިކަން ފޯރުކޮށް ދިނުމަށް އަޅަން ޖެހޭ ފިޔަވަޅުތައް ބަޔާންކޮށް ތައްޔާރުކުރާ ޕްލޭން އެކުލަވާލުމުގެ ޢަމަލީ މަސައްކަތް ފަށާގޮތަށް ވަނީ ހަމަޖެހިފަ އެވެ.
މި މަސައްކަތް ދ. އަތޮޅުގެ ހުރިހާ ރަށެއްގައި މި ހަފުތާގެ ތެރޭގައި ކުރިއަށް ގެންދާނެ އެވެ.
އިބަމަ ގްރޫޕްތައް ދ. އަތޮޅުގައި ޤާއިމުކުރުމަށް މިހާރު ކުރިއަށްގެންދާ ތަމްރީނު ޕްރޮގްރާމް އިންތިޒާމުކުރުމުގައި ދ. އަތޮޅު ކައުންސިލް އިދާރާގެ ވަރަށް ބޮޑު އެހީތެރިކަމަކާއި އެއްބާރުލުމެއް އަންނަނީ ލިބެމުންނެވެ.
މިއީ އިޖުތިމާޢީ ބަދަހި މަދަދުވެރިންގެ ގްރޫޕްތައް އުފެއްދުމަށްޓަކައި މި ވުޒާރާގެ ފަރާތުން އިބަމަ އިބްތިދާޢީ ޕްރޮގްރާމް ކުރިއަށްގެންދާ 16 ވަނަ އަތޮޅެވެ. މި ޕްރޮގްރާމް މިހާތަނަށް އަދި ކުރިއަށް ނުގެންދެވޭ އަތޮޅުތަކަކީ ބ، ކ، އއ އަދި ތ އެވެ.
މީގެ ތެރެއިން މި ޕްރޮގްރާމް ދެން އެންމެ އަވަހަށް ކުރިއަށް ގެންދާ ގޮތަށް ހަމަޖެހިފައި ވަނީ ބ. އަތޮޅުގަ އެވެ.
"އިބަމަ" އަކީ ރަށްރަށުގައި އިޖުތިމާޢީ ރައްކާތެރިކަން ފޯރުކޮށްދިނުމުގެ މަސައްކަތް ކަމާ ގުޅުންހުރި މުއައްސަސާތަކާއެކު ވިލަރެސް ކުރެވިފައިވާ ނިޒާމެއްގެ ތެރެއިން ކުރުމަށްޓަކައި އުފައްދާ ގްރޫޕްތަކެކެވެ.