ސަރުކާރުގެ މަޝްރޫޢުތައް ކުރިއަށް ގެންދިއުމަށް ދިމާވެފައިވާ ގޮންޖެހުންތައް ހައްލުކުރުމަށްޓަކައި ކޮންސްޓްރަކްޝަން މިނިސްޓްރީގައި ބައްދަލުވުމެއް އިއްޔެ ބާއްވައިފި އެވެ.
މި ބައްދަލުވުމުގައި ކޮންސްޓްރަކްޝަން މިނިސްޓްރީގެ އިސްވެރިންނާއި، މަޝްރޫޢުތަކާއި ގުޅުންހުރި އެހެނިހެން މިނިސްޓްރީތަކުގެ އިސްވެރިން ބައިވެރިވެ ވަޑައިގެންނެވި އެވެ.
ކޮންސްޓްރަކްޝަން މިނިސްޓްރީން ބުނީ މި ބައްދަލުވުމުގެ މައިގަނޑު މަޤްޞަދަކީ މިވަގުތު ހިންގަމުންދާ މަޝްރޫޢުތަކަށް ދިމާވެފައިވާ ގޮންޖެހުންތައް ދެނެގަނެ، އެ ކަންކަމަށް އަވަސް ހައްލެއް ހޯދުމަށް މަގުފަހިކުރުން ކަމަށެވެ. މި ބައްދަލުވުމުގައި މަޝްރޫޢުތަކުގެ މަސައްކަތް ހަލުވިކުރުމަށް ކުރެވިދާނެ ކަންކަމާ ގުޅޭގޮތުން ވެސް މަޝްވަރާކުރެވުނު ކަމަށްވެސް މިނިސްޓްރީން މައުލޫމާތުދެ އެވެ.
ކޮންސްޓްރަކްޝަން އެންޑް އިންފްރާސްޓްރަކްޗާ މިނިސްޓަރު ޑރ. އަބްދުﷲ މުއްތަލިބް ދާދިފަހުން ވަނީ މަޝްރޫއުތައް ހުއްޓޭ ސަބަބުތަކުގެ ތެރޭގައި އެޑްވާންސް ފައިސާ ނުދިނުމާއި ކުންފުނިތަކުގައި ނެތް ކެޕޭސިޓީގައި މަސައްކަތްތައް ހަވާލުކުރުން ހިމެނޭ ކަމަށެވެ. އެގޮތުން ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) އަށް މިހާރުވެސް 35 އަށްވުރެ ގިނަ މަޝްރޫއު ހަވާލުކޮށްފައިވާ ކަމަށް އޭނާ ވިދާޅުވި އެވެ.
މީގެ އިތުރުން މަޝްރޫއުތައް އާންމުކޮށް ޓެންޑާއަށް ހުޅުވާ ނުލައި ސަރުކާރު ކުންފުނިތަކާ ހަވާލުކުރުމުންވެސް މަޝްރޫއުތައް ކުރިއަށް ނުގޮސް އެބަހުރި ކަމަށް މުއްތަލިބް ވިދާޅުވި އެވެ.