ހޯމް މިނިސްޓަރު އަލީ އިހުސާން ނުފޫޒު ފޯރުވަނީ ހަމައެކަނި ފުލުހުންނަށް ނޫން ކަމަށާއި ކޯޓްތަކުގެ ގާޒީންނަށް ވެސް ނުފޫޒު ފޯރުވާ ކަމަށް އަދާލަތު ޕާޓީ އަށް ނިސްބަތްވާ ދީނީ އިލްމުވެރިޔާ ޑރ. މުހައްމަދު އިޔާޒް ވިދާޅުވެއްޖެ އެވެ.
އަންހެނެއްގެ ކަރުގައި ވަޅި ޖައްސައިގެން ބިރު ދެއްކި މައްސަލައިގައި ހައްޔަރުކޮށް ޖަލުގައި ބަންދުކޮށްފައި ހުއްޓާ މަރުވި އާދަމް އަތުހަރުގެ މަރުގެ މައްސަލައާ ގުޅިގެން ހޯމް މިނިސްޓަރު އަލީ އިހުސާން ފުލުހުންގެ މައްޗަށް ސިޔާސީ ނުފޫޒު ފޯރުވަމުންދާ ކަމަށް އެމްޑީޕީން ތުހުމަތުތަކެއްކޮށްފައި ވަނިކޮށް އެކަމާ ގުޅުވައި ސޯޝަލް މީޑިއާ ޕޯސްޓެއްގައި އިޔާޒް ވިދާޅުވީ ހޯމް މިނިސްޓަރު ނުފޫޒު ފޯރުވަނީ ފުލުހުންނަށް އެކަނި ނޫން ކަމަށާއި ގާޒީ ވެސް އިންނަވަނީ ހޯމް މިނިސްޓަރުގެ މުށުތެރެއަށް ލައި ފިއްތާލާފައި ކަމަށެވެ.
ފުލުހުންނަށް އެކަންޔެއް ނޫން. މުއްދަތު ޖަހަން އިންނަ ޤާޟީވެސް އިންނަވަނީ @min_mohst ގެ މުށުތެރެއަށް ލައި ފިއްތާލާފައި. އެމަނިކްފާނު އޯޑަރ ދެއްވިގޮތަކަށް ނޫނީ ރަބަރ ސްޓޭމްޕް ނުޖެހޭ. މާތް الله މިނޫން އުޖާލާ ދުވަސްތަކެއް ދިވެހިންނަށް ދައްކަވާށި. އާމީން. https://t.co/9zW6oahjob
— Dr.Mohamed Iyaz (@dr_iyaz) September 6, 2024
އޭނަގެ މި ވާހަކައާ ގުޅިގެން މި ސަރުކާރަށް ތާއީދުކުރާ މީހަކު، ގާޒީ އަށް މިނިސްޓަރުގެ ނުފޫޒު އޮތްކަން ޝެއިހް އަށް ބުނަން އެނގެނީ ކިހިނެއްތޯ އެހުމުން ރައްދުގައި އިޔާޒު ވިދާޅުވީ އެގޮތަށް ވިދާޅުވީ ހެކި ވެސް ހުރެގެން ކަމަށެވެ.
"އިތުރަށް ބޭޒާރުވާން ބޭނުން ނޫން ނަމަ ހަނު ހުންނަވާ." އިޔާޒް ވިދާޅުވި އެވެ.