ރާއްޖޭގެ މަސްވެރިކަމާއި މަހުގެ އުފެއްދުންތައް މާކެޓްކޮށް، ޕްރޮމޯޓްކުރަން ހާއްސަ ބްރޭންޑެއް ޑިވެލޮޕްކޮށް ދޭނެ ބަޔަކު ހޯދަން މޯލްޑިވްސް ފިޝަރީޒް އެންޑް އޯޝަން ރިސޯސެސް މާކެޓިން އެންޑް ޕްރޮމޯޝަން ކޯޕަރޭޝަން ލިމިޓެޑް (އެމްއެފްއޯއާރްއެމްސީ) އިން ހުޅުވާލައިފި އެވެ.
އެ ކުންފުނިން ބުނީ މިކަމަށް ޝައުގުވެރިވާ ތަޖުރިބާ ހުރި ކުންފުނިތަކަށް އެކްސްޕްރެޝަން އޮފް އިންޓަރެސްޓް (އީއޯއައި) ހުށަހެޅުމުގެ ފުރުސަތު މި މަހުގެ 22 އާ ހަމައަށް ހުޅުވާލާފައިވާ ކަމަށެވެ.
މަސްވެރިކަން ޕްރޮމޯޓްކުރަން އުފެއްދި އެމްއެފްއޯއާރްއެމްސީ އަކީ ޑތ. މުހައްމަދު މުއިއްޒުގެ ސަރުކާރުން އުފެއްދި ކުންފުންޏެކެވެ. އެ ކުންފުނި އުފެއްދީ މި އަހަރުގެ ފެބްރުއަރީ މަހު އެވެ.
މި ކުންފުނި އުފެއްދުމުގެ މަގުސަދުތަކުގެ ތެރޭގައި ރާއްޖޭގެ މަސްވެރިކަމުގެ ޞިނާޢަތު އިތުރަށް ފުޅާކޮށް މުޖުތަމަ އަށް އެ ޞިނާޢަތުން ލިބިދޭ މަންފާ އިތުރުކުރުމަށްޓަކައި އެކުއަކަލްޗަ އާއި މެރިކަލްޗަ ފަދަ ކަނޑުފަޅުގެ އެންމެހާ ވަސީލަތްތަކުން އުފައްދާ އުފެއްދުންތައް ހިމެނޭ ގޮތުން، ރާއްޖޭގައި ކުރާ މަސްވެރިކަމުން އުފައްދާ އުފެއްދުންތައް ބައިނަލްއަގުވާމީ ބާޒާރުގައި އިޝްތިހާރުކޮށް ޕްރޮމޯޓްކުރުން ހިމެނެ އެވެ.
އަދި އޭގެ ވިޔަފާރިން ލިބޭ މަންފާ އިތުރު ކުރުމަށްޓަކައި ރާއްޖޭގެ މަސްވެރިކަމަށް ޚާއްޞަ ބްރޭންޑެއް ތަޢާރަފުކޮށް، ގައުމީ ބާޒާރާއި ބައިނަލްއަގުވާމީ ބާޒާރަށް ނެރުމާއި، ފެންވަރު ރަނގަޅު އަދި މަތީ އަގު ލިބޭ ތަފާތު ބާޒާރުތަކުގައި ރާއްޖޭގެ މަސްވެރިކަމުގެ އުފެއްދުންތަކަށް ހިއްސާ ހޯދުމަކީ ވެސް އެމްއެފްއޯއާރްއެމްސީ އުފެއްދި ސަބަބެކެވެ.
ރާއްޖޭގައި މިހާތަނަށް މަސްވެރިކަމާ ގުޅުން ހުރި މަސައްކަތްތައް ކުރަމުން އަންނަނީ ސަރުކާރުގެ މަސް ކުންފުނި، މިފްކޯއިންނެވެ. އެ ކުންފުނިން މަސްވެރިންގެ އަތުން މަސްގަތުމާއި މަސް އެކްސްޕޯޓްކުރުމާއި އައިސް ދޫކުރުމުގެ އިތުރުން "ފެލިވަރު" ގެ ނަމުގައި މަހުގެ ތަފާތު އުފެއްދުންތައް އަންނަނީ ވިއްކަމުންނެވެ.